Esaki ta temponan di incertidumbre causa pa e pandemia COVID-19. Asina mes mundo ta para keto awe pa celebra e hecho cu publico tin derecho riba informacion liber y cu nan tin periodismo como nan fuente primario y confiabel di noticia. Aunke na Aruba y den Caribe Hulandes, nos ta celebra “Dia di Prensa” riba 1 di september, toch ta bon pa señala cu e aña aki, memey di un pandemia cu tin mundo den su garanan, cu UNESCO ta enfoca hopi riba e necesidad pa por conta riba bon informacion den e temponan aki.
E clave di e confiansa den media riba otro forma di comunicacion pa informacionnan robes, mentiranan y rumornan, ta bin door di e trabou duro cu media y periodismo ta haci diariamente pa trece noticia confiabel. E cualidad di contenido ta un trabou caro y riesgoso. Trabou di periodismo y editornan pa filter data cu rigor y precision. Hopi biaha, nan mester tuma riesgonan pa pasa restrincionnan y limitacionnan den diferente forma pa tin aceso na informacion scondi. Observando, puntrando, investigando, denunciando, exponiendo, criticando y mustrando formanan nobo y solucionnan ta e contribucion usual di un bon periodismo. Ta e consistencia den calidad di periodismo cu sociedad ta mira media como servicio esencial durante e pandemia global aki.
Ta di lamenta, cu e pandemia a debilita e basenan financiero di hopi media na mundo y aki tambe na Aruba. Propagandanan y circulacion a cay rapidamente door di recesion economico, cu consecuencia cu a forsa hopi reduccion di personal y di periodistanan.
No ta facil traha den e temponan aki
Ta balora e determinacion di media y periodismo cu ta trahando den tempo di restrincion pa haya acceso na fuentenan door di estado di emergencia, manera indica na Aruba, Chile, Salvador, Trinidad y Tobago, entre otro paisnan. Riba e dia special aki, no kier ignora e hecho cu ainda nos ta biba den un region cu tur dia ta test e curashi di periodismo. Nos ta condena violencia y falta di castigo pa crimennan contra periodismo.
Periodistanan na Aruba ta uniendo
ASAP ta felicita tur media y nan personal p’e trabou relevante cu ta realisa tur dia pa fomenta y fortalece libertad di prensa, cu ta fundamental den e bida democratico. Esaki mes ta motibo cu, tambe dor di e pandemia y restriccionnan cu el a trece pa e forma di busca noticia, a causa cu coleganan a uni pa funda un asociacion. Mientras cu ta atendiendo aspectonan legal, a cuminsa cu recluta miembronan pa pasa dor di e proceso di acreditacion. Ta realisa cu solamente dor di traha uni y hunto, por logra enfrenta retonan den nos trabou diario, tanto na nivel di Gobierno, cu autoridadnan competente y den otro aspectonan di e trabou periodistico.
Tocante ASAP
Riba diasabra 11 di april 2020 un grupo a reuni cu e proposito pa funda y organisa un asociacion (vereniging), considerando cu pa hopi aña caba no tin un organisacion activo pa atende cu e derechonan di periodistanan y desaroyo di periodismo en general na Aruba. Tambe cu tin necesidad awor pa trahadonan den medionan di comunicacion tin un asociacion profesional pa regula y maneha nan mesun forma di funciona teniendo na cuenta e responsabilidad di tur sector den e comunidad di Aruba y saliendo for di e principio di respet mutuo y cu comunidad ta depende mas y mas di medionan di comunicacion pa ta bon informa.
Ta cu e realidad aki a dicidi pa funda un asociacion (vereniging) nobo, cu e nomber di Asociacion Arubiano di Prensa (ASAP) pa por representa tur persona cu ta traha incansablemente den medionan di comunicacion y cu tin como tarea pa informa nos comunidad. E prome directiva tin 7 miembro y cu nan ta: Miriam “Mimi” Koolman-Rosel (Presidente), Raymond Hoek (Vice-Presidente), Nilton Lacle (Tesorero); Mark Benson Denz (Secretario), Marko Espinoza (Secretario Internacional), Maritza Faro (Comisario di Miembresia) y Edmond Croes (Comisario).
Ta den contacto estrecho cu otro organisacionnan den Reino Hulandes y internacionalmente pa por promove mas sinergia y aliansa cu e asociacion Arubiano. E aliansanan aki lo mester conduci den mas cooperacion, miho preparacion y educacion di esunnan cu tin como trabou di tur dia, pa informa nos pais.
