E organisacion cu ta representa pensionadonan publico OPPA, tambe tabata presente na e reunion cu sindicatonan tabatin cu Parlamento. Na final Ivo Valdez, presidente, a duna su comentario.
Valdez a cuestiona con OPPA cu su mas di 30 aña di existencia, cada bes mester lucha pa haya reconocimento. Asina por ehempel a organisa Dialogo Social y ta laga nan afo. Y den e reunion yama entre Parlamento y Sindicatonan.
OPPA a bisa cu e pensionadonan ta consciente cu nan tambe ta duna. Pero no por pensa cu tur pensionado tin un bon entrada y tampoco mester lubida cu loke nan ta cobra tur luna ta placa cu durante añas a paga na prima. Ta placa cu nan merece haya.
Den e pensioen cu nan ta ricibi, segun Valdez ta splica, tin cuatro elemento cu ta sali di presupuesto di Gobierno: Bashipremie; reparatietoeslag; e uitkering di 150 y gelijkbedrag. No tur pensionado ta haya e mesun bashiepremie, pasobra ta depende cuanto aña a traha cu Gobierno; e gelijkbedrag si tur hende ta hay’e mescos. Ta dispuesto pa entrega pero ta pidi un trato husto pa esnan e miembronan cu tin menos entrada.
Tur pensionado ta paga belasting y prima di AZV cu tin biaha ta mas halto cu algun di e politiconan. Nan ta representa mas di 1600 pensionado y tin derecho di participacion. Tur e preocupacionnan ey ta motibo tabata kier pa forma parti di tur e dialogonan.
Den contacto cu Prome Minister, el a sigura OPPA cu no ta bay mishi cu e placa di e pensionadonan, cu excepcion di e Gelijkbedrag cu ta bay bah’e cu 50%. Mayoria di e miembronan no tin problema cu esey, Pa e pensionadonan cu a sali di Gobierno entre 2011 y 2014 e mitad di e suma ey ta representa un poco mas di 16%.
