Vocero di Departamento di Impuesto, Meverly Romano, tambe tabata na e oficina principal di Camacuri Bispo di Pasco.
El a splica cu nan a haya yamada cu e container di e plachinan di number ta cla pa wordo habri. Personal di Douane tabata tey pa klaar in y asina e trabaonan a start mesora. Ta hopi caha tin pa baha. E persona cu ta doño di e empresa a bisa cu ta dura mas of menos 4 ora pa baha tur e cahanan, pasobra nan kier pone nan tambe den secuencia di number di biaha. Esaki ta yuda hopi tambe pa ora cu cuminsa cu e controlamento, e bay bon.
Directora di DIMP a tuma contacto cu e hefe di departamento financiero, cu ta e seccion cu ta atende cu e parti aki. DIMP ta cla pa pone nan team pa bin hunto ya dia 27 di December. E ora lo bay cuminsa cu e controlamento. Tin un team cla caba cu tin cu wordo yama pa nan bin hunto pa asina e trabaonan start. Mas sigur lo bay keda tambe traha despues di oranan di trabao pa asina por completa e controlamento mas lihe posibel.
Esey ta e meta di DIMP, pa asina mas lihe keda cla cu e controlamento di tur e plachinan. Mas lihe nan por cuminsa parti nan tambe.
Tur esaki a sosode na ultimo ora. E ta un cambio hopi grandi. Romano a comenta tambe, cu ta gradici compania Retraco cu a coopera tur tempo cu nan, a duna su maximo pa haci e bestellingnan. E tabata pone DIMP na altura con leu e proceso di e fabricacion di e plachinan ta. Con e plachinan ta wordo fabrica. DIMP tabata basta updated con e proceso tabata bayendo. E barco mester a yega Aruba dia 13 di December ultimo.
Esey no a pasa. El a yega 6 dia mas laat y awo e compania a keda cla cu e sacamento di e carga for di waf, inklaring di Douane, etc.
Tambe tin cu bisa cu Douane a duna su cooperacion completo pa por saca e carga mas lihe posibel, pasobra tin hopi presion di tur clientenan di Aruba henter, pa por haya e plachinan di number.
Tin di compronde cu tin un persepcion den comunidad cu DIMP lo ta partiendo e plachinan di number y esey no ta corecto. Awor a bin haya nan y no a cuminsa partinan ainda.
Tin basta persona cu ta cooperando completamente. Comerciantenan ta cooperando, Douane ta cooperando. E team di personal di DIMP ta cooperando. Gerencia ta hopi gradicido na esey. Ta di spera cu tur cos sigui cana bon y cu pronto por anuncia ki fecha ta yama tur esnan cu a paga nan number caba pa bin busca nan plachi. Esey lo bay sosode masha lihe, asina cu keda cla cu tur e controlamento di e plachinan.
