Tur aña tin un klas nobo di Scol di Polis cu ta bay traha riba caya despues di a caba nan MBO4. E biaha aki tin dos klas riba nivel 3 y tin tambe un klas di MKO (Midden Kader Opleiding) cu a cumpli cu nan exigencianan. Nan ta bay bek den praktijk pa guia e hobennan cu awe a haya nan diploma.
Jeannette Richardson Baars di Scol di Polis, por wak bek e 10 añanan cu e ta na scol, como un desaroyo hopi bon. Tin un progreso masha grandi mes cu unda cu Aruba mes por haci su mesun opleidingnan den tur nivel pa percura pa agentenan di Cuerpo Policial ta educa na un bon manera, pa nan sa exactamente kico pa haci pa por eherce nan trabao mas miho cu por.
Ultimo fase di kaderopleiding
Richardson ta agrega cu awor aki ta bezig cu e delaster fase di e Kaderopleiding. Ta trata aki di MKO y HKO (Hogeropleiding Kaderopleiding. Esey ta e version Arubiano cu Richardson a sigui na Hulanda, cual ta Academia di Polis. Otro aña aki na Aruba mes ta bay guia nos mesun hendenan pa bira un inspector. Esey ta esnan cu tin e KO-diploma caba. Banda di esey tin un trayecto cu a menciona tambe cu ta na Corsou cu tin cinco hende cu ta di rango mas abao. Nan tin un preparacion mas halto y a selecta nan pa nan haci e mesun trayecto. Esey ta nifica cu dentro di dos aña si tur cos ta bay bon, tin 25 inspector nobo na Aruba/Corsou. Esey ta un logro nobo.
Mas polis
Scol di polis kier mira mas polis. Tur aña tin por lo menos un klas. Esey ta nifica 20 pa 25 hende cu por cuminsa nan opleiding nivel 4. Pero tin tambe un nivel 3 y 2, cu ta e Tourism Oriented Police. Ta spera cu pa otro aña of e aña siguiente por cuminsa cu dos klas atrobe. Si tin hende interesa pa bira polis, solicita. Na september ta bay habri solicitud pa otro aña nivel 4. Mester ta realistico, e proceso di seleccion ta tuma casi un aña prome cu bo ta cla cu tur test. P’esey, pa esnan interesa pa e klas di otro aña, cuminsa inscribi for di september.
Un dia grandi
Segun alto comisario Andrew Hoo, fuera di e otorgamento di diploma, tabatin huramentacion di 15 polis nobo, cu ta bay subi caya pronto pa nan stage na october. P’esey nan mester a huramenta y a completa un fase tambe di nan opleiding. Los di esey tambe tabata tin algun otro klas cu a sigui nan trayecto.
Den su discurso alto comisario Hoo a menciona cu ora bo bira polis, bo ta crece academicamente y den rango, pasobra tur cos ta liga na e lesnan. Nunca un hende ta stop di siña ora cu bira polis.
Kico por spera
Den pasado, ta drenta opleiding, ta subi caya y esey ta tur. Bo ta keda traha y haya experiencia. Despues di algun tempo a bin implementa cierto proceduranan cu ta mara cu si subi di rango, mester cierto opleiding. P’esey awo tin e suerte cu na Aruba mes por duna e opleiding ey, na luga di cada biaha bay Corsou of Hulanda.
Actualmente a cuminsa cu e Hoge Kader Opleiding, riba nivel di inspector y a cuminsa, hunto cu e Academia di Polis di Hulanda, e MTL (Management Taktische Leidinggevende), cual tambe ta encera e opleiding di Inspector cu ta bay cuminsa awo. Alto Comisario ta orguyoso di e opleiding cu lo produci inspectornan nobo den un futuro cercano.
Conseho di alto comisario.
Alto Comisario Hoo tin un conseho pa e polisnan nobo. Semper keda bo mes. Keda corda pakico bo a bira polis. Ora cu ciudadanonan bin puntra pa bira polis, ta puntra si sa kico e trabao ta encera. No ta solamente bin traha pa gobierno pa un salario. E ta un yamada cu bo ta haya y no ta tur hende ta haci’e. E ta un trabao ingrato y tur hende tin un critica.
Bao di e uniform tin un ser humano. Esaki ta un di e caracteristicanan cu e Alto Comisario kier pa e polisnan nobo mantene nan mes na dje. No ta pasobra tin un uniform esey kiermen bo ta bira otro hende. Keda bo mes, Alto Comisario Hoo a bisa por ultimo.
