E aña’ki e actividad conoci ‘Earth Hour’ – Ora di Planeta ta bay concentra su mes mas tanto den cada hogar di nos comunidad. Tur esnan cu ta participa ta paga luz y desconecta e aparatonan no esencial pa un ora largo. E accion aki ta uno di amor y responsabilidad personal cu cada un di nos tin pa cu nos planeta. Elthon Lampe y Anna Maria Croes di Earth Hour Aruba Community ta tras di e proyecto aki.
Earth Hour Aruba a ricibi apoyo di Sagicor Life Aruba N.V. cu lo yuda pa promove e actividad importante aki y asina pone cada miembro di nos isla consciente pa baha nan uzo di electricidad pa un ora.
Ademas, hopi di hotelnan grandi lo participa pagando nan luznan no esencial y asina sostene e causa importante aki, unda por observa participacion activo di entre otro A.T.A. y AHATA.
Earth Hour ta un movemento global cu e meta entre otro pa hisa e consciencia pa cambio di clima y e impacto cu esaki tin riba nos medio ambiente. Earth Hour ta wordo organisa door di World Wide Fund for Nature (WWF), cu ta promove tur actividad cu ta bay na fabor di e ciudadano y tambe nos medio ambiente.
E Ora di Planeta a cuminsa como un actividad di paga luz na Sidney, Australia na aña 2007 cu cada aña ta crece mas y asina a bira masha famoso globalmente.
Na aña 2020 un total di 190 pais a participa y door di e pandemia actual di Covid-19 esaki a bira un actividad online cu mas o menos 3.1 miyon di hende. Awo den 2021 lo sigui online y hopi ciudad a anuncia nan participacion cu accionnan di paga luz den hogarnan, pero tambe monumentonan famoso, manera China’s Forbidden City, Paris’ Eiffel Tower, Table Mountain na Capetown, Great Pyramids na Egypt, London’s Buckingham Palace, estatua na Brazil Christ the Redeemer. Ademas na Merca e Niagara and Victoria Falls, na New York su Empire State Building, na Australia Sydney’s Opera House y hopi mas.
Mescos cu tur aña ta pidi pa Aruba uni na e bon causa aki y mustra mundo cu nos dushi isla di Aruba por contribui na e evento global di ‘Ora di Planeta’ pagando tur e luznan y aparatonan electrico no esencial durante un ora riba diasabra 27 di maart 8:30 pm pa 9:30 pm.
Di e forma aki, ‘Earth Hour Aruba Community’ kier gradici e comunidad di Aruba pa nan participacion. Danki Aruba den nomber di Earth Hour Aruba Community
