Diadomingo ultimo, dia 26 di februari, Torneo Himno y Bandera 2023 organisa pa Sportvereniging Aruba Juniors a inicia. E torneo lo clausura e weekend di 18 y 19 di maart 2023 cu participacion di Los Amigos di Corsou y Stars di Bonaire.
Aruba lo ta representa pa cuater ekipo cu ta hungando pa clasifica pa e gran weekend final. E prome siman tabatin cuater wega bon bataya unda cu den e prome wega Glovers a gana Surprise 7-0. E di dos wega tabata entre Bambino y Astros, cu a gana e wega cu score di 9 pa 2. Aruba Juniors ta gana Jani’s 8 pa 3 den e di tres wega y clausurando e atardi Boomerang ta sorprende Tigers cu score di 7 pa 3.
Diadomingo awo 5 di maart tin cuater wega programa desde 9:30am. E prome wega lo bay entre Bambino y Boomerang sigui pa Glovers contra Jani’s pa 11:15am. E rivalnan Astros y Tigers lo topa otro pa 1:00pm. E wega aki lo ta un interesante pa clasificacion. Den e ultimo wega Surprise lo enfrenta e team di cas Aruba Juniors.
Tur amante di softball 60 plus ta cordialmente invita pa bin apoya e streanan di antes. Bar y cushina lo ta bon surti. Nos ta warda bo.
