Ta for di algun rato caba cu e team di recherche di districto di San Nicolas ta buscando un sospechoso di fam Maduro. Tin denuncia haci contra su persona y hasta tin ordo di detencion p’e. Diabierna atardi alrededor di 6:10 pm a señal’e den e area di ex-Rey Hing Supermarket (caminda patras) na Pos Chikito.
A pidi refuerso mesora pa wak con por pone man riba e persona aki. Ta consider’e un persona “vuurwapengevarlijk” pa cual a pidi pa tene extra cautela. Motor unit, K9-Unit, polis di districto di San Nicolas y Sta Cruz a duna refuerso, pa cual den un rato di ora a logra deten’e.
E detencion sinembargo no a bay sin un persecucion, ora a dun’e señal pa para, el a ranca careda riba un scooter color preto. A controla den un container, caminda e figura lo ta biba pa djey sigui direccion warda di polis pa e proceso di interogacion.
