Minister Presidente mr. Evelyn Wever-Croes a bisa un rato pasa cu e cantidad ta hopi halto, hopi preocupante, pero pa pone den contexto, e ta e cantidad debi na hopi mas test cu ta efectuando, pasobra e virus aki a plama na diferente fuente”. E prome mandatario a haya notificacion oficial di Departamento di Salud Publico (DVG) cu tin 92 caso nobo pa e dia di awe. Esaki despues cu tabatin 5 caso dialuna, 5 caso diamars, 39 caso ayera y 92 caso nobo awe. E ciudadanonan aki ta bon di salud, no ta rekeri atencion medico y ningun ta den hospital.
“Lo mi no keda straña si den e siguiente dianan e cantidad aki lo sigui aumenta. Nos ta prepara pe, nos tin suficiente test y hospital ta bon prepara pa e 92 casonan nobo aki”, asina Minister Presidente mr. Evelyn Wever-Croes a vocifera un rato pasa. E presidente di Crisis Beleids team a subraya cu tin un panico awor den comunidad, cu a practicamente “jam” y pega henter e sistema. “Si bo tabata den contacto cu un persona cu a test positivo of bo tabata den un establecimiento cu ta un bron, den e casonan ey pa inmediatamente Bo keda cas y bay den self quarentine y informa Bo Dokter. Mester warda pa haya un cita, pasobra tur hende ta ocupa. Si Bo bay haci test Bo mes y si e sali positivo, toch ta Bo mes tin cu keda cas y isola Bo mes pa warda e virus sali for di Bo curpa. Ta solamente den caso cu Bo mester atencion medico, cu lo duna prioridad na Bo caso.
Minister Presidente a bisa na final cu a tuma algun medida adicional, pa percura cu den 2 pa 3 siman, por purba domina e aumento den e casonan aki. Por lo pronto, te proximo aviso, tur bar, rum shop, clubnan nocturno ta cera y fiestanan na cas ta prohibi. Ta encurasha tur hende pa bisti un tapaboca, pa pura proteha nan mes mas.
Na e momento aki tanto na LabHOH na Hospital como na otro laboratorionan priva tin filanan di hende cu ta haciendo test pa mira si nan tambe ta infecta cu e virus. Esaki ta causando un panico inecesario y cu ta pega henter e sistema di testing. Aunke ta nota cu e proceso di haci test por bay relativamente lihe, ora e yega na DVG pa procesa, pa haci contact-tracing y atende cu e pashent cu mester ta isola, tur cos ta pega. Parce cu DVG no tin suficiente man pa por atende tur e casonan cu ta bin pareu y pa coordina cu tur e resultadonan drentando pareu. Pesey, Gobierno ta pidi comunidad poco pasenshi den e momento aki.
“Aruba a pasa den esaki caba. E cantidad di casonan aumentando ta serio y ta grandi. Mi ta descepciona. Mi ta preocupa. Sinembargo, no ta motibo pa bay den panico. Nos ta prepara pa e scenario aki y e ta bayendo confirma tur nos protocol y reglanan. Loke nos falta ta Bo cooperacion, dor di atene Bo mes na tur regla”, asina Minister Presidente mr. Evelyn Wever-Croes a termina bisando.
