Comunidad ta den shock pa detencion di dos hoben menor di edad relaciona cu crimen contra bida di un persona. Tur esaki a sosode e aña’ki cu ta apenas 7 dia bieu.
E mas recien caso ta esun di diaranson anochi den Madiki unda e hoben NT di apenas 16 aña a kita bida di su mesun welo. Un siman prome tabatin detencion di e hoben LM di 15 aña sospecha di a kita bida di (ex) pareha di un familiar, esta Rudy Ras. Den ambos caso curpa di e victimanan ta confisca pa autopsia.
E agresividad di e delito aki y e edad hoben ta loke tin comunidad den shock. Den ambos caso e arma uza tabata un cuchiu cu a kita bida di persona cu e hobennan conoce.
Den ambos caso e investigacion apenas ta andando, pero si yega asina leu cu tin suficiente prueba acumula pa hiba e hobennan dilanti mesa berde, e acusacion contra ambos lo ta di a kita bida di un persona. Un acusacion hopi grandi y grave pa dos hoben di apenas 15 y 16 aña di edad.
Den casonan normal di adulto, un acusacion di e indole aki lo nifica un castigo maximo di 24 aña di prizon. Corte poco biaha ta bay na e maximo, amenos cu tin circunstancianan pisa manera si e ta un crimen repititivo, si e tabata envolvi mas biaha cu husticia, e victima ta un persona cu e conoce, y e circunstancianan bou di e cual a comete e delito.
Den caso di hobennan cu ta menor di edad por lo general no ta huzga nan como adulto. E castigo maximo pa un menor den un caso di “kita bida di un persona” ta 4 aña, sea e ta pas’e den un seccion hubenil di prizon of den un instituto, dependiendo di su condicion mental.
E ultimo biaha cu Aruba a tende di un caso similar manera esaki tabata esun cu a sosode na januari, 2017. Un mucha muhe di 15 aña biba na Zeewijk a cana bay un supermercado na Cura Cabay. Ey el a cumpra veneno y a tir’e den orange juice cu e intencion di mata su wela di criansa. E tabatin 15 aña y a trata su caso porta cera. Pa e delito aki el a haya 12 luna di “Jeugddetentie”. Esaki tabata e unico caso den ultimo cinco añanan.
Tanto Psychiatra como Psicologo lo wordo envolvi den investigacion di e caso aki. Pero analistanan ta bisa cu hopi biaha cu uza cuchiu, esaki ta señal di hopi rabia y ta riba personanan hopi cerca di e agresornan.
Na Merca un experto a yega di bisa den e caso di un studiante di 16 aña cu a hinca varios compañero di scol lo siguiente: “Cualkier momento cu un persona comete un atake of un asesinato door di choca, hinca of via contacto hopi di cerca, e ta semper señal di hopi rabia y kisas un contacto personal cu e victima, compara cu e uzo di un arma di candela.” Palabranan di Naftali Berrill, un Psicologo forensico di ciudad di New York. “Ora cu bo ta hinca un persona, e ta cerca y den bo cara. E experiencia ta mas primitivo y mas grafico, mas provocativo. E ta mustra su emocion hopi mas, sea rabia of paranoia.”
Comunidad ta pendiente di e desaroyo aki.
