Dia 14 di februari ta celebra dia di tur persona namora of Dia di San Valentin, momento unda cu amor ta tuma e papel protagonico y ta sosode escena romantico den tur skina di nos planeta.
E enamoradonan ta duna regalo na nan pareha, ta pidi matrimonio n’e persona stima y e rednan social ta inunda cu frase di amor y tambe di meme riba e dia di tur esunnan namora, algun di nan hopi imaginativo y dibertido.
Den e celebracion di e dia aki generalmente tin e custumber di sali bay come den pareha of bay mira un pelicula, sin lubida di intercambia algun regalo manera chuculati, flor of joya. Si bo no comparti e nificado comercial di Dia di San Valentin, tin hopi cos cu bo por haci sin gasta placa, manera disfruta di un marathon di pelicula riba Dia di e Enamoradonan na cas, pasa tempo hunto den un paseo romantico of dedica frase di amor na bo pareha.
Si bo no tin pareha, bo tambe por celebra amistad cu bo amigonan of disfruta di e humor di e memenan cu sa manifesta riba e rednan social riba e dia aki.
Na Aruba, tambe nos ta celebra e dia aki. Cant’i caminda, bo ta wak hopi hende con nan ta laga nan creatividad los y ta traha obra di man, peluche, flor y decoracionnan masha bunita mes pa Dia di San Valentin. Nos reporteronan a subi caya pa asina puntra e comunidad di Aruba, kico nan ta desea como un regalo of kico nan lo duna nan pareha como regalo, riba e Dia di San Valentin aki.
Hopi di nan a bisa di lo acepta loke cu nan pareha regala nan, pasobra ya, t’e intencion ta loke ta conta. Algun a bisa di ta detayista otro a bisa cu nan ta acepta un regalo, basta cu e ta duna cu sinceridad.
Un dama tambe a bisa algo masha importante, ta tur dia ta dia di amor y amistad, algo pa balora tur dia di nobo…
Tabata tin varios cabayero cu ainda tabata pensando kico pa duna nan pareha, hiba nan bay come of bay cas di otro, wak… Neflix?
Pero… con cu bo kier pasa e dia aki, hacie un dia pa recorda y celebr’e cu e persona mas importante den bo bida, sea ta bo pareha, bo casa, bo mama, bo tata, bo ruman y te hasta un di bo miho amistadnan. Importante ta, pa despues di San Valentin, sigui celebra e amor y cariño tur dia di nobo.
