Koninklijke Marechaussee mester stop di controla e personanan basa riba nan color di cuero, segun un corte di Den Haag. Asina tambe ta anula un decision anterior di Corte unda cu elaboracion di un profiel etnico si tabata permiti.
Ta trata di e controlnan MTV (Mobiel Toezicht Veiligheid), uza pa controla e pasaheronan di avion, trein of via terestre di e paisnan di Union Europeo. UE no mag di tin control na frontera, pero si por controla pa impedi cu e persona ta keda ilegalmente atras na Hulanda.
Argumento di Estado Hulandes tabata cu pa Marechausee, en principio, color di cuero of rasa no ta motibo di control, pero si por ta relevante. Por ehempel ora cu hopi migrante di un pais specifico drenta e pais.
Pero e argumento ey no ta valido, segun corte. El a dicta cu e color di cuero di un persona ta precisamente loke pa Marechaussee ta determina pa efectua un control riba un persona. “Si solamente e color di cuero tabata diferente, lo no tabata tin niun seleccion.”
Ademas, corte ta haya cu estado no a demostra cu e color di cuero di un persona ta un bon criterio tocante un persona su origen of nacionalidad. Esey ta haci tambe cu etnicidad no ta un bon indicador den caso cu tin hopi migrante di un pais specifico.
“Haci un distincion a base di rasa, sin hustificacion obhetivo y rasonabel, ta un forma specialmente grave di discriminacion,” segun e presidente di Corte. Ademas, el a bisa cu e politica di Marechaussee tin un impacto negativo riba sociedad den su totalidad. “E ciudadanonan Hulandes c’un color di cuero contrario n’e blanco por sinti nan mes no acepta y como ciudadanonan di segunda clase,” el a afirma.
Na november 2021 caba, Marechaussee a anuncia cu lo stop di uza profielnan etnico. No ta mucho cla si nan a stop berdaderamente cu esaki. Den un prome reaccion riba e sentencia, Koninklijke Marechaussee a bisa cu ainda nan tin cu studia e sentencia.
Mpanzu Bamenga, cu na 2018 Marechaussee a saca for di un rij na aeropuerto di Eindhoven, a bisa di ta contento cu e sentencia. “Tabata un lucha di varios aña, pero porfin corte a dicta loke nos tabata sa caba: cu ami, como ser humano, no por wordo husga riba mi color di cuero. Esaki no ta bisa nada si e persona ta un criminal of no. E ta un victoria pa mi mes, pa mi yiunan y eigenlijk, pa tur hende na Hulanda.”
