Tabata 11:01pm cu automobilistanan a nota stof bay halto na altura di ex-Club Caribe na Camacuri, net yegando Motor World. Un auto marca Suzuki, modelo Baleno, coriendo for di Oranjestad direccion pariba, pa un motibo of otro a perde control, baha caminda na man robes y bay dal den un mata. E impacto tabata asina fuerte cu e auto a kibra den dos y e chauffeur a keda benta riba caminda.
Un boluntario den mundo di cuido tabata un di e prome personanan pa yega na e sitio pa brinda asistencia. El a sigura cu e victima tabatin un poco pols ainda, pero cu pocopoco el a perde. Paramediconan riba ambulance a yega lihe na e sitio pero no obstante esfuerso pa reanima e chauffeur, toch na dado momento a opta pa warda nan ekiponan numa y pidi presencia di un dokter na e sitio.
Pa 11:50pm dokter Texier a constata morto di Andre K.J. De Cuba, naci na Aruba dia 1 di october 1959. Palabranan di condolencia na famia di e fayecido.
