Parlamentario mr. drs. Arthur Dowers (AVP) a vota pro den aprobacion pa ley di codigo di procedemento penal (strafordening). Esaki segun Dowers, ta un ley cu ta dura hopi aña pa trata, e leynan cu AVP a cuminsa e procesonan di dje tempo di nan gobernacion. “Pero ta hopi importante pa bisa cu e ley aki tin e cosnan den dje cu ta necesario, y por garantisa e proceso legal cana bon den bon pais. Garantisa tur derecho di hende.” E ley aki no ta bay solamente over e criminal, pero e sospechoso. Den nos sistema aworaki bo ta inocente te ora prueba cu bo ta culpabel di un delito.
Lamentablemente a start discusion politico den parlamento dialuna mainta durante tratamento di e ley aki, segun Dowers, unda e minister di Husticia a lansa algun cos barata. “Cu e no por soluciona e problemanan cu ta existi pa hopi aña, awor, claro no ta pidi pa soluciona e problema den dos dia. Pero no ta nifica si cu e problema ta existi pa hopi tempo, cu bo ta pidi pa bira minister bay busca voto, anto bo ta keda conta e mesun storia cu bo a hereda 20 aña, etc. Ora mi tabata minister tambe tabata tin problema cu ta existi pa 20 aña.”
E parlamentario ta sigui bisa cu awe e gobierno ta cosechando di e inversionnan cu gobierno di AVP a haci. “E mes tabata director na prizon y sa con hopi placa nos a inverti den prizon no solamente den infrastructura, pero tambe den e aspectonan tecnico pa garantisa cu e prizon por keda opera.” E parlamentario ta lamenta profundamente cu den tratamento di un ley asina importante pa loke ta e proceso democratico den pais, cu e ta hunga politica barata.”
Orden van Advocaten a presenta un carta cu parlamentario Dowers ta kere ta na su luga, pasobra a bini cierto cambionan cu ta pidi nan atencion manera e situacion malo den e celnan. Ta lamenta cu ta aplasa e periodo di introduccion den un sistema diferente den tene hende den detencion. E realidad ta tambe cu tecnicamente gobierno no por implement’e. Esey ta nifica cu gobierno lo mester a bini parlamento y informa cu lo mehora algun di e condicionnan. “Pasobra bo no por percura pa tur hende yega den un ‘huisbewaring’ pero no ta nifica si bo ta den un cel di polis pa haya trato cu ta haya regularmente.”
Pa kico AVP a sostene e ley?
Den su tempo Dowers ta conta cu tambe a haya e momentonan cu hende ta bisa bo cu nan ta drumi riba beton. Bo por duna hende matras no tin necesidad pa nan drumi riba beton asina. Tabata tin algun cu ta destrui cosnan pero no ta nifica cu tur hende mester pasa malo pasobra un of dos hende ta haci malo. “Minister ta papia di un comision cu e mesun hendenan cu no ta percura pa cosnan cana bon aworaki, ta bin un comision di nan mes. Mi a bisa minister na varios ocasion cu mi no ta di acuerdo.”
E parlamentario ta spera cu si den futuro bini cambio den cosnan chikito, pasobra tin cosnan cu por bay diferente sin necesidad di un huisbewaring pa haci e cosnan diferente. Segun Dowers, fraccion di AVP a sostene e ley pasobra den nan tempo caba esaki ta un ley cu a traha riba dje y nan no tin motibo aworaki pa no sostene. Cu tin cosnan cu mester mehora, sigur, y den e simannan y luna venidero Dowers ta bisa cu bo lo tende cu mester bin cambio atrobe. “Pasobra Hoge Raad of Europese Hof a duna algun sentencia cu cierto cos no ta bon, no solamente na Aruba, na e islanan y Hulanda tambe atrobe lo bini cambio den e tipo di leynan aki.
