Parlamentario Arthur Dowers di fraccion di AVP a cuestiona e Minister ‘Bula Cabes’ Andin Bikker, ya cu ademas di ta gaña y a manda hefe departamento cas pasobra a comete blunder, pero e mes no ta manda su mes cas pa e blunder cu el a comete cu e pedofiel cu a wordo laga liber prome cu el a caba di sinta su castigo.
Dowers a bisa cu ainda e por corda con Partido Democracia Real a traha un video cu yama “Bula nan cabes” ora cu MEP tabata bula cabes di hende y a bisa cu esaki no mester wordo haci. Awe ta mira cu e ta haciendo hustamente esey.
“Awor el a drenta Gobierno y cera cabes c’un persona cu e mes a yama ‘spin dokter’, un hende eigenlijk el a yama pa corupto. Un par di siman despues a bira forma Gobierno cun’e.
Ora cu bo caba di cera Gobierno, bo a lubida tur principionan di bo partido cu tabata para pa dialogo habri cu pueblo y democracia. Bo a bula cabes di yen di hende, bo a bula cabes di diferente ambtenaar.”
Asina tur hende por corda, e Parlamentario a sigui splica, con algun siman pasa el a bula cabes di dos top ambtenaar, un di nan na IASA y e otro na Inmigracion, y hasta a papia cu e tin un acuerdo cu un di nan e top ambtenaarnan pa bay haci algo otro. `
A resulta cu e no tin un acuerdo cu nan, y el a resulta di ta un gañado. El a bisa cu un di nan a comete un blunder dor di a deporta un mucha ilegal.
“Mi ta puntra mi mes si un hende ta wordo poni na trabou pa bringa ilegalidad, e ta cumpliendo cu esey y bo ta mand’e su cas pasobra el a deporta un persona ilegal. Nos di AVP ta hayando tur prueba cu ta duna indicacion cu e persona aki no a comete un eror. Pero si e persona ey a comete eror, bo no a bis’e pidi dispensa y a lague sigui traha. Bo a bula su cabes y a mand’e cas.
Awo cu abo a comete un di e erornan di mas grave na e comunidad aki, un cos masha bergonsosos bo a haci y bo ta bin riba ordo di ‘spin dokter’ pidi dispensa dos biaha. Atardi bo a lora manga di camisa, bay na un prizon bieu cu bo mes a cera, pasobra e tabata funciona masha bon, pa mustra cu bo ta traha. Esey no ta traha.
Traha ta nifica cera cabes cu e departamentonan, traha un Plan di Maneho. Cumpli cu e palabracion di maneho, asumi responsabilidad, traha drechi. Siña con pa haci bo trabou como Minister di Husticia. Ora di haci fout grave manera bo a haci, tene honor na bo mes,” sr Dowers a sigui mustra.
E Parlamentario a bisa cu e mes ta un persona cu ta di pensamento cu core c’un persona no ta e solucion. Cada bes den pasado cu tabatin un crimen den e pais aki por a tende sr Andin Bikker y Wever Croes ta grita e tempo ey cu Dowers mester tuma su retiro. “Awo mi no ta mira sra. Wever Croes mes, kende ta un di nan cu a bisa cu e ta contra abuso di mucha. Pero awe no ta tende di dje y el a keda keto keto. Nos no ta scuch’e bisa cu sr. Bikker mester tuma su retiro. Ora bo pone e midi di e altura ey pa otro bo mester duna e ehempel cu abo si ta tene bo mes na e midi cu bo a pone pa otro. Ami nunca bo a pidimi tuma retiro pasobra mi a comete un eror. Bo a puntrami pa tuma mi retiro na momento cu criminalnan a faya den comunidad. Awo cu un criminal a faya y bo mester ser’e, abo ta dun’e su libertad y haci comosifuera nada no a pasa. Bo a djis bis sorry. Y cos a sigui manera nada no a pasa. Ami no ta kere cu esey por den e comunidad y mester cuminsa tene responsabel. Si abo ta bulando cabes di hende inocente, cu ta cumpli cu nan trabou y djis pasobra bo tin bo agenda politico sushi pa cumpli cun’e, ta momento pa abo tambe tuma bo retiro.”
E parlamentario di AVP a bisa cu e ta spera e politiconan cu si tin e curashi, cu ta mantene nan mes na transparencia y bon gobernacion, exigi e Minister aki pa tuma su retiro. AVP por bis’e pero AVP no por bah’e, pero momento a yega pa pone un ehempel di loke ta bon gobernacion den e pais aki.
