De bes en cuando tin preguntanan haci riba bon maneho y gobernacion cu hopi biaha no tin un contesta. Armand Hessels, presidente di Stichting Deugdelijk Bestuur Aruba (SDBA) ta cuestiona esaki y a trece varios punto dilanti como djis un pregunta simpel.
“Si Bo lo ta doño di un empresa grandi, na momento di selecta un director, Bo lo scoge pa un persona cu:
- solamente ta popular, sin tin ningun tipo di experencia di maneho;
- no tin e minimo idea con pa traha un presupuesto y ta entrega esey hopi luna laat;
- ta presenta structuralmente presupuesto deficiente cu mas gasto cu entrada;
- no ta practica control di e gasto- y entradanan;
- nunca ta entrega un cuenta anual aproba pa un accountant;
- pa e motibo ey semper ta duna motibo pa duda di su integridad;
- ta tuma mas personal den servicio sin cu tin placa pa cubri e gastonan ey;
- ta tuma personal den servicio sin e cualificacionnan necesario;
- ta ehecuta proyecto cu semper ta costa hopi mas cu a presupuesta y pa cual no ta cla si a uza e placa debidamente;
- pa e motibonan aki tur aña ta causa perdida cu consecuencia cu mester presta mas na banco;
- al fin y al cabo ta hiba Bo empresa na un bancarota sigur?
Si pa BO EMPRESA nunca Bo lo scoge pa un director asina, pakico Bo ta scoge SÍ pa GOBERNANTE asina??? Pasobra cada bes atrobe Aruba ta scoge pa e mesun partidonan cu ta comete tipo di gobernacion asina,” Hessels ta finalisa.
