E asociacion di panaderonan tabata bezig cu gobierno encuanto prijs di pan, pa wak si por haya un vrijstelling of no riba e prijs pa evita cu e prijs di pan ta subi, na momento cu entrante 1 di Juli, e crisisheffing cu lo drenta na vigor.
Miguel Nucete a splica cu a reuni cu Gobierno algun siman pasa. Den e ultimo dos simannan a haya diferente e-mail bay bin, unda cu nan tabata pidi nan financials, factura etc.
No sa si nan ta kedando cla di nan banda. A bisa cu no lo logra keda cla pa dia 1 di Juli. E asociacion a sinta hunto cu a wak cu tin cu subi prijs di pan cu 10 cent pa retail. Despues ta bin e BBO, BAZV y BAVP, cu ta bira 6% awo. Ta bay tin un aumento riba e prijs di pan.
Diferente schakel
E wholesale price actualmente di un kipashi bruin ta 3.50. Awo e ta bay bira 3.60. Pero riba e 3.60, tin e 6%. Djey tin atrobe 6% ora cumpre na caha ora di retail. E ora ey e ta afecta un 45 pa 47 cent extra riba e prijs di pan. Ta trahando cu Gobierno ainda pa wak si ta logra hinca e pan den canasta basico. E no a wordo descarta ainda, ta trahado riba dje pa wak si por logra hink’e den e canasta basico y elimina e BBO, BAZV, BAVP for di riba e canasta basico, e ora e prijs di kipashi bruin y tur otro pan, lo baha, enbes di subi. Por ta un kipashi bruin na 3.75. Actualmente e ta 4 florin y e lo bay bira 4.32. E lo baha na 3.75 si nan logra.
Palabracion
Nucete a sigui splica cu no tin echt un fecha ainda. Pero a priminti si cu ta trahando riba esaki. Ta spera pa dia 1 di Augustus esaki lo keda cla, pero te ainda no sa esey. Gobierno ta cooperando cu e asociacion. Ta hayando varios informacion for di nan cu ta trahando riba dje. Ta spera cu ta lo mas pronto posibel.
Entrada y salida
Gobierno sa kico ta pasando den e negoshi di pan. Semper e tabata asina. Den pasado nan tabata pidi financials y factura di diferente suppliers pa nan controla pa wak si e prijs mester subi. E ta un tiki fastioso di entrega financials asina, pero ta parti di e trabao. Por ehempel otro wholesaler cu ta importa koffie, y otro cosnan cu ta cay den canasta basico, nan tambe tin cu entrega nan factura pa asina gobierno pone un wholesale prijs y un retail price. E problema ta cu pan, bo ta fabrik’e. Mester tur e facturanan di salo, sucu, lechi, diferente sorto di cos, pa e ora ey hink’e den otro, saca un formula, con pa traha e pan. P’esey nan ta pidi’e.
E compra di producto
Por ehempel ta cumpra hariña na e wholesaler y entrante dialuna awo, nan ta bay pone 2.5% mas riba dje. Nan ta bay pone 6% na nan factura abao. Ora cu bay bende na supermercado, restaurant of hotel, e ora e tin cu pone 6% riba e factura. Djey despues, e rebendedor, na caha, tin cu cobra e consumidor e 6%, e ora e ta bira 3 biaha 6%.
Mas cos na benta
Riba tur cos, en general, te hasta si bo no subi bo prijs mes, p’avia di e 2.5% porciento e prijs automaticamente ta subi. Si bo custuma di yega cumpra un donut na 1.80, por ta awo e lo bay bira 1.85, p’avia di e 2.5%. Esey ta si bo no subi e prijs. Pero hopi hende ta subiendo prijs, te hasta un tiki extra caba.
Mensahe
E prijs di pan di mashin no lo subi’e. Ta lag’e e mesun cos. No mas lo paga 2.5% mas na caha. E ta e unico diferencia. Pero pan di mashin a logra pa want’e. E ta un pan di pueblo. E ta un pan costoso. E ta 75 cent y lo want’e na e mesun prijs. Nada mas enbes di paga 3.5%, ta paga 6%. Esey ta e unico diferencia.
Kipashi blanco ta na 4.08. Ta calcula cu e ta bay ta na prijs final, pa e consumidor. Lo tin cu paga 4.10. Esey ta bay ta na caha.
