APA: Port City sigur ta bay ta di gran importancia pa economia di Aruba

APA ta den un proceso pa ehecuta un proyecto grandi cu tin di haber cu Port City. Marc Figaroa, director di Aruba Ports Authority, a splica cu Port City ta un proyecto basta grandi y di gran importancia pa Aruba y ta canando su caminda.

Den combersacion cu 24ora.com, el a conta cu na e momentonan aki  e ta bayendo den e siguiente fase, cu ta encera finalisacion di e aspecto legal di tereno. “E meta ta pa cuminsa cu e proceso pa e tender process por tuma luga pa fin di e aña aki. Esey ta bay cana su caminda.”

 

Ta bay ehecuta e proyecto aki riba un periodo di 10 pa 15 aña, unda cu e prome pida tereno lo ta otorga na cuminsamento di otro aña. E proceso di destaho ta programa pa cuminsa caba pa fin di e aña aki.

Interes

Figaroa a sigui splica cu e proyecto ta consisti di diferente fase. E preferencia sigur ta bay pa local. Pero esey no ta descarta cu internacionalmente por haya participacion den esey. “Con cu bay bin, tin cu wak con e ta hinca den otro y kico e concepto cu lo kier bay tin eynan cu ta bay cumpli cu deseo di e inversionistanan.” Pero e por bisa for di awor caba cu tin hopi interes, tanto local como internacionalmente. Esey tambe ta e empuhe cu tin pa acelera e proyecto. Y a enfatisa cu e ta hopi importante pa economia di Aruba tambe. 

Kico tin den mente

E meta di e proyecto ta pa balansa e parti di turismo y atrae e localnan tambe. E ta un proyecto cu ta bay ta consisti di boutique hotel, residencia y tambe, mirando cu ta bay tuma asina tanto tempo, tin intensionnan pa bin cu por ta un small entertainment venue.

Harbour Arena ta sumamente popular pa concierto of festividadnan. APA ta bezig ta evaluando kico tur lo bay cun’e den cada fase. Por ehempel, si kier mantene e tendencia cu tin awor eyfo. P’esey e ta un proyecto cu por dura entre 10 y 15 aña.

Entrada

E proyecto aki sigur lo bay genera entrada pa APA. Esey ta un di e motibonan tambe pakico ta bay ehecuta e proyecto aki. Tambe como empuhe pa Aruba su economia. APA ta cla pa bay comercialisa y haci’e un organisacion mas moderno. Esaki ta parti di e visionnan cu tin pa APA.

Espacio pa barconan mara

Realisacion di e proyecto lo no afecta e parti crucero. APA ta keda cu e piernan pa acomoda e barconan. Esey no ta bay cambia nada, segun Figaroa. E proyecto aki lo bay complementa e experiencia. E importancia di e proyecto ta cu kier pa e stimula e centro. Ta trahando conhuntamente cu tur e stakeholdernan, unda cu por complementa e centro di ciudad tambe.

E proyecto aki ta bay ta algo full diferente y no lo bay competi cu e centro di e ciudad, ni e area di Palm Beach. E ta bay complementa full un otro proceso. Si un turista yega cu avion, su experiencia pa bay te hotel, lo bay ta uno sublime. Awor aki ta mira e hekinan, cual no ta un biahe placentero tur ora. E publico ta bay tin acceso te lama. E edificio no ta bay ta canto di lama, sino ta bay tin un caminda, unda cu autonan por pasa tambe, Figaroa a splica.