Hunto cu presidente di San Nicolas Business Association, Errol de Freitas a reuni cu director di DIP, Haime Croes tocante desaroyonan pariba di brug. Tin varios proyecto para y/of cu no por cuminsa paso nan ta pega den un proceso na DIP. Por ehempel ciudadanonan cu tin varios aña wardando riba tereno pa traha un cas, di otro banda tanto casnan verval y/of terenonan di pueblo bashi cu a wordo duna, pero no ta wordo uza na un bon manera. Comerciantenan cu kier expande nan servicio na pueblo, inversionistanan nobo, proyectonan pa sector primario etc. Director di DIP a informa nos cu algun di e proyectonan ta rekeri accionnan di esunnan cu a haci e peticion pa cumpli cu e rekisitonan. Tambe a menciona cu tin tramitenan cu mester wordo haci, no door di DIP, pero door di otro departamentonan gubernamental. Nos lo sigui analisa e proyectonan riba mesa pa mira unda nan ta pega.
Loke sigur a bin dilanti ta cu DIP tin varios retonan interno, organisatorio y procesonan cu mester haya atencion pa eventualmente por mehora e servicio cu ta duna na pueblo. Procesonan cu no t’ey mes/anticua, cu mester traha/renoba na un manera cu e ciudadanonan por compronde e procesonan y por calcula adelanta si lo honra nan peticion y dentro di cuanto tempo. Si acaso tin leynan cu mester wordo traha/adapta pa DIP por funciona, Parlamento mester sa, pa nos tambe por cana e caminda y duna DIP e hermentnan cu e tin mester.
Ta obligacion di mando di e departamento pa haci su huiswerk, bin dilanti bisa kico ta bay bon/malo den su organisacion y e plan pa mehora. P’esey, durante un reunion publico mi a haci e peticion na nos Minister di Infrastructura pa percura cu na januari 2023 DIP bin Parlamento y presenta un vision/plan con lo mehora e servicio cu DIP ta duna na pueblo di Aruba y asina tambe aporta na desaroyonan pariba di brug.
