Siman a habri Aruba cu un tremendo noticia. Dialuna mainta 18 di juli nos a presencia conferencia di prensa di Gobierno di Aruba na unda Minister di Deporte Endy Croes a anuncia cu pronto Lotto pa Deporte ta bek den man di pais Aruba. Esaki sigur ta un logro importante y historico pa e mundo di deporte y pa Aruba.
Minister Endy Croes hunto cu hunta di Supervision di Lotto pa Deporte a renegocia un acuerdo nobo y faborabel na beneficio di deporte, nos deportistanan y pa Aruba en general. E contract cu Fundacion Lotto pa Deporte tabatin cu Canadian Bank Note tabata uno desproporcional unda den 10 aña di tempo Lotto pa Deporte a haya 34 miyon y CBN a haya 104 miyon. Awo cu e contract nobo lo bay bolter e sumanan aki creando asina un espacio grandi pa inverti den deporte. Esaki ta significa cu den un futuro cercano tin mas oportunidad pa inverti den infrastructura di deporte, facilidadnan deportivo lo haya nan debido mantencion y atencion. Tambe lo inverti den nos deportistanan. Si nos inverti den deporte, bo ta invertiendo den siguridad di Aruba. Cada un hoben deportista, ta un hoben menos riba caya.
Concluyendo palabranan di pabien na minister Endy Croes, ekipo negociado, Hunta di Supervision di Lotto pa Deporte y Gabinete Wever – Croes 2 cu e bunita logro aki cu sigur lo contribui na desaroyonan positivo na bienestar di deporte y nos deportistanan.
