Recientemente e compania local Airtech a bira un distribuido oficial di e compania di airco McQuay, cu desde 2006 ta cay bou di e compania Hapones Daikin Industries. Daikin tin un trayectorio di mas o menos nobenticinco aña den fabricacion di airco. Daikin ta enfocando riba innovacion pa loke ta trata e productonan inverter y berde, esta producto cu ta bon pa medio ambiente. Cu esaki nan ta promoviendo un likido special, esta e ‘koelmiddel’ di airco, R-32.
Den cuadro di esaki, Juan Fontana, representante di McQuay den Caribe, a splica cu Aruba, a pesar di ta un di e islanan mas chikito den Caribe ta un mercado sumamente importante pa e compania ya cu ta di suma importancia pa e distribuidonan local trece producto di calidad brinda un servicio excelente na e comunidad. Asina nan a tene un seminario na POVA enfocando riba e temanan di servicio, mantencion di airco y ‘troubleshooting’. Fontana a splica cu e compania Daikin Industries tin cierto protocol y forma di traha cu airco cu lo conduci na un miho mantenemento y funcionamento di e sistema di airco.
Tambe el a splica cu Daikin ta bay determina e futuro di airco, cu e sistemanan inverter, e productonan berde cu ta locual nan ta enfocando riba dje cu e distribuido local Airtech. Fontana a conta cu Airtech ta un di e distribuidonan cu ta enfocando pa promove e producto aki y ta haciendo e cambio di R410 pa e ‘koelmiddel’ R32, cu ta sumamente ecologico y ta percura pa un mayor eficiencia y menos consumo electrico, cu na final lo conduci na un miho rendimento di e airco.
Fontana e termina recomendando un y tur pa acudi cerca nan distribuido si ta en busca di informacion riba e miho practica pa instalacion di airco, e miho ekipo y/of si tin algun proyecto di airco den futuro.
