Ta parce cu e ministernan di Gabinete Wever-Croes tin problema cu cumpli cu nan promesa.
Na varios ocasion 24ora.com di un forma masha transparente a indica con e ministernan no ta papia e berdad of no ta cumpli cu nan promesa. Sea ta algo di caliber mas grandi te na palabracionnan simpel cu nan no por cumpli cu ne.
Riba 18 di september 2023 un biaha mas por comproba cu Minister di Husticia, Rocco Tjon no a cumpli cu su palabranan. Den cuadro di e ultimo desaroyo, caminda cu e persona cu a negocia cu pais Aruba, e tempo ey cu ex-Minister Andin Bikker pa cera un deal pa uzo di un helicopter na disposicion di Cuerpo Policial.
E persona en cuestion, recientemente a entrega su mes na Drug Enforcement Administration (DEA) na Merca den cuadro di investigacionnan di narcotrafico.
E ta atacha e credibilidad di Cuerpo Policial, pa ta haci uzo di un helicopter cu sea directo of indirectamente ta sospecha di ta envolvi den baho mundo. Minister Tjon a duna di conoce durante un conferencia di prensa di gobierno cu e decision di Cuerpo Policial pa “ground”e helicopter te proximo aviso tabata un decision mucho trempan tuma y cu pronto polis lo saca un otro “Korpsmededeling” informando cu lo sigui uza e helicopter.
E mandatario tabata asina sigur di su mes, cu el a indica cu prome cu dia cera, e “Korpsmededeling” lo sali.
Corectamente Cuerpo Policial a para pa integridad y “ground”e helicopter. Pero ta parce cu Minister Tjon no a logra convence drs. Ramon Arnhem, altocomisario di Cuerpo Policial pa e “trek in”su decision pa Cuerpo Policial no haci uzo di e helicopter.
E dia a cera y por comproba cu Minister Tjon un biaha mas no a cumpli cu su promesa.
