Parlamento di Aruba ta tratando e ley pa introduccion di BBO na frontera. Durante e reunion, Misha Raymond di RAIZ a saca un “jab” tira riba su partner di coalicion, esta MEP. El a indica claramente cu si e ley di “logopedie” no bay na vigor of no tin luz di dia, e no lo por sostene e ley di BBO na frontera, kende ta riba mesa awe. E “jab” di Raymond tabata uno basta fuerte, mirando cu 11-2= 9, cu ta nifica cu e ley di BBO na frontera lo no pasa. Raymond a bisa publicamente cu; un ley di desaroyo no ta mas importante cu un ley di bienestar general. E kier mira e servicio di “logopedie” den e pakete di AZV y si esey no por, no tin ley di BBO tampoco.
No a dura mucho cu Minister Presidente, mr. Evelyn Wever-Croes a contesta e parlamentario di fraccion RAIZ, esta su partner di coalicion. E declaracion di e minister-president tabata mas bien pa calma e fraccion cu ta sostene gobierno p’asina toch conta cu nan sosten pa e ley di BBO na frontera.
Segun minister-president, el a papia tanto cu Minister Dangui Oduber y departamento huridico di gobierno, kende a inform’e cu e introduccion di e ley y servicio di “logopedie” den e pakete di AZV lo bay na vigor entrante 1 di augustus 2023. Ta parce cu mester a bay asina leu di menasa cu no lo sostene ley pa e ora ricibi contesta. Raymond ta wardando for di 2021 pa un contesta, a manda “rappel brief” y mucho mas pero sin contesta, ta parce cu MEP a sinti e cayente y pa calma e situacion a informa Raymond pa tene pashenshi, pasobra lo atende cu su preocupacion.
Awo ta cuestion di mira con Raymond lo vota, mirando cu ainda den segunda tanda, el a vocifera cu e kier mira e ley pa inclui “logopedie” den pakete di AZV no mas tarda of hunto cu introduccion cu BBO na frontera. Ta di mira si Raymond lo cambia di opinion of toch lo keda para riba su “no” pa BBO na frontera.
