E siman cu a pasa tabata tin dos dia di training y concientisacion riba standardnan di agricultura organisa pa Idea, di departamento di Asuntonan Economico bao di auspicio di Cosme.
Michael Seepersaud, team leader na un proyecto di Cosme, cual ta un proyecto cu fondonan di Union Europeo, basa na British Virgin Islands, a splica cu riba e prome dia, a trata bon practica agricultural y e di dos dia di training nan a trata cu e Codex Standard pa productonan organico agricultural.
Henter e idea ta pa promove autosuficiencia y competividad agricultural, pa door di mustra e agricultornan of expone nan na bon standardnan agricultural y si aplica e guianan aki, nan por produci productonan riba un calidad comparabel, cu cualkier tipo di producto na mundo.
Na final di e curso esnan cu a forma parti di e training aki, a haya un certificado di participacion for di sr. Seepersaud, kende sigur a keda satisfecho cu e atencion cu e participantenan a demostra durante di e curso aki.
