Recien Aruba Food & Beverage Association (AF&BA) a dirigi un encuesta bou restaurantnan tocante e crisis di CONVID 19 y con restaurantnan ta experiencia esaki. Un total di 36 restaurant (12%) a responde riba e encuesta.
E prome pregunta tabata: “Bo restaurant a solicita e subsidio di salario?”, 61.1% di restaurantnan a responde di a solicita pa subsidio mientras cu 38.8 % a responde di no a solicita pa subsidio. Conclusion aki por encera cu tin restaurant cu por ta no a aplica pasobra tin “mixed” feelings di por habri bek y a prefera di keda den FASE, of a dicidi di tur modo pa no aplica.
Riba e di dos pregunta: “Con lo describe e status di bo restaurant”, 83.3% a responde di ta totalmente sera – ZERO Sales -, 11.1% a contesta di tin 25% di benta y 5.56% a responde di a cay cu 50% di benta. Kiermen e cifranan aki ta mustra con e sector di F&B a haya sla duro pa falta di turismo y e lock down.
Riba e di tres pregunta: “Bo restaurant lo habri cu un terras dia 25 di Mei?”, 36.1% a responde di lo habri cu un terras mientras cu 63.89% a responde di no lo abri cu un terras.
Riba e di cuater pregunta: “Cuanto di bo personal bo lo pensa di por mantene aki 3 luna?”, 61.11% a contesta di pensa cu lo por mantene 100% di e personal; 16.67% a responde di por mantene 75% di su personal; 11.1% a contesta di por sostene 50% di su personal y 25% a responde di por sostene 25% di su personal. E contesta aki ta refleja optimismo tambe pa e subsidie recien otorga y e speransa cu esaki por dura a lo menos te luna y incluyendo Juli. Basa ariba e pregunta aki por conclui cu sinembargo 1000 empleados lo perde nan trabou den e sector di F&B.
E di cinco pregunta tawata: “Cuanto di bo personal bo ta pensa di por retene aki 6 luna?”. Cu un occupacion proyecta door di AHATA di mas o menos 30% na November, 47.22% ta pensa cu ainda por mantene 100% di personal te final di Oktober; 25% ta pensa cu por mantene 75% di personal y 22.22% ta pensa di por mantene 50% di personal, mientra cu 5.56% ta pensa di por mantene 25% di personal. Kiermen cu tres luna mas den crisis e percentage di restaurant cu por mantene tres luna extra cu poco touristas ta baha di 61% pa 47%, cu ta pensa cu por retene personal cu 100%. Esaki ta ensera tambe cu hopi restaurant lo no sobrevivi sin subsidio.
Riba e di 6 pregunta: “Ki dia bo ta pensa e lo ta safe y sostenibel di habri e restaurant?”, 13.89% ta pensa cu lo por habri e restaurant na Juni; 5.56% ta pensa cu lo por habri na Juli; 8.33% ta pensa cu lo ta na Augustus y 13.89% ta pensa den 5 of 6 luna. 27.78 % a contesta cu lo habri dia cu Gobierno lo participa cu lo ta safe y 30,56% ta insigur ainda. Remarcabel ta e gran cantidad di restaurant cu no sa ki rumbo ta tuma ainda. Algun analisis di e contesta aki por guia nos di conclui cu un 200 restaurant ta pensa di ta habri aki 6 luna. Un proyeccion di AHATA di un ocupacion e tepo ei di 30-40% lo justifica 100 restaurants habri lo ke lo forza e sector den un “ survival of the fittest” unda 200 restaurants ta considera di ta habri na November.
Riba e di 7 pregunta: “Bo ta considera sera bo restaurant?” Akinan 8.33% a responde cu lo sera y 83.3% a contesta cu lo sigi mientras 8.33% a contesta di no ta sigur ainda.
AFBA tin plan di sigi monitoria e status di restaurantnan otro luna cu otro pregunta cu lo encera e apertura di terrasjes, e ‘Aruba Health & Happiness Code’ y algun di e mesun preguntanan cu tin cu haber cu reapertura di restaurantnan. En general a refleha un gran satisfaccion den e forma cu SVB y GOA a maneha e subsidio di salario.Considerando asina hopi desafio, AF&BA ta recomenda restaurantnan pa dialoga cu su empleadonan pa jega na acuerdonan pa menos ora y dia traha ja cu un ocupacion di 30 – 40% a base di 100% personal den futuro tin potencial pa hiba e restaurant na bankarota. Flexibilidad di nos leynan laboral lo ta jabi segun AF&BA y ta urgi GOA pa cuminsa pensa den e direccion aki. Preguntanan na AF&BA por wordu dirigi via
