Durante e siman ku a pasa frakshon di PAR a hasi diferente bishita di trabou na organisashon, kompania i fundashonnan paden i pafó di gobièrnu pa haña mas informashon konkreto.
Den kuadro di esaki a bishitá tambe Curaçao Airport Partners (CAP).
E bishita su meta ta pa tuma nota di e konstrukshon nobo di nos aeropuerto i tambe e trabou ku ta wòrdu realisá pa mehora e servisio di Curaçao International Airport. Sr. Ralph Blanchard direktor di CAP a duna frakshon un splikashon amplio riba tur e kambionan i tambe e plannan ku CAP tin.
Tur esaki pa por akapará un fluho mas grandi di pasahero i ofresé tantu e pasahero komo e aerolínea nan un mehor servisio. Na 2017 Curaçao International Airport ta planeá pa manehá un fluho di 1.4 mion pasahero pa aña. Frakshon di PAR ta konvensí ku un aeropuerto na nivel, ku por akapará Kategoria 1 i tambe e standart nan internashonal di aviashon, ta indispensabel pa kresementu di nos turismo i nos konektividat en general. Ku kresementu di e aeropuerto mas kupo di trabou lo wòrdu kreá i tambe mas oportunidat pa empresanan lokal establesé nan negoshi na aeropuerto. Pa aña 2018 ta premirá un kresementu di 1.8 mion pasahero i diferente aerolínea lo kuminsá bula e ruta di Kòrsou.
Aparte di e presentashon aki, frakshon di PAR den Parlamento di Kòrsou a hasi un rekorido den e partinan ku ta bou di konstrukshon pa asina ei por a haña un mihó bista di ekspanshon di nos aeropuerto i papia tambe ku diferente trahadónan ku ta laborando riba e konstrukshon di aeropuerto. Frakshon di partido PAR den Parlamento di Kòrsou ta satisfecho ku e bishita i ta impreshoná ku e bon trabounan ku CAP ta hasiendo pa sigui pone Kòrsou “On The Move” i asina logra e máksimo potensial di Kòrsou.
