Pa di dos aña consecutivo, Aeropuerto Internacional Reina Beatrix ta cende su luznan pa e temporada aki di Pasco. Separa di e decoracionnan paden, ta opta pa decora e parti pafo tambe cu luznan di color. Den pasado Aeropuerto tabata decora e rotonde situa net dilanti nan edificio, pero a opta awor pa enfoca mas dilanti di nan terminal mes.
Aña pasa a cuminsa cu decoracionnan un poco mas simpel, pero cu e aña aki a haci’e hopi mas bunita y grandi. “E intencion ta pa tur aña agrega mas decoracion na e area dilanti aeropuerto”, asina Hendrick Croes, Vocero di Aruba Airport Authority NV a enfatisa.
Tur hende cu pasa cu nan auto dilanti e terminal di aeropuerto, lo por mira cantidad di luznan decorativo modelo LED na tur e palonan di luz, mientras cu riba e plenchi a uza luznan mas chikito pa duna un dushi ambiente di Pasco.
A scoge e colornan cu ta cuadra cu e logo y imagen di Aeropuerto Internacional Reina Beatrix, cu ta e color blauw, berde, geel y blanco. E trabounan di decoracion ta den man di profesionalnan cu atrobe a haci un bunita trabou.
E evento awe nochi a conta cu hopi musica y bon ambiente entre e empleadonan di Aruba Airport Authority y empleadonan di e diferente companianan cu ta traha den e terminal di Aeropuerto.
