Adult & Teen Challenge Aruba a ranca sali den 2019 cu un proyecto masha importante. E ta creacion di un Centro di Hende Muhe, cu lo brinda ayudo na e ser femenino cu ta riba caya y cu problema di adiccion. Den e Centro nan lo wordo guia pa cuminsa un bida nobo y sobrepasa nan problemanan. Importante ta e forma con e organisacion aki ta traha, segun e Presidente Yvonne Simon Andrade a splica den un entrevista. Nan enfoke ta pa yuda e ser femenino, kendenan despues di un forma of otro tambe ta yuda pa sigui brinda e apoyo necesario den e comunidad di Aruba.
Simon ta admiti cu e reto di tur fundacion na Aruba ta e aspecto financiero. P’esey nan enfoke ta traha riba proyectonan sostenibel. “Nos fundacion ta para pa proyectonan cu ta sostenibel, di negoshinan cu por lanta di e fundacion mes y sostene nos. Esey ta masha importante. E studiantenan tambe ta wordo siña con pa traha den e negoshinan cu wordo lanta p’asina nan drenta e mercado laboral. Esaki ta e forma cu e organisacionnan Teen Challenge rond di mundo ta traha. Nan ta depende di loke nan mes ta produci den e programa. Pues nos ta traha rond di e programa cu ta guia e fundacion,” sra. Simon a splica. El a agrega cu den esaki nan lo tin mester apoyo di e comunidad den e proyectonan cu ta wordo realisa.
E intencion ta pa pusha pa logra di habri asina cu e prome becadonan caba cu e programa, sinembargo dia tras di nan ta mira e necesidad creciendo. Practicamente tur dia ta ricibi yamada buscando ayudo, pasobra na Aruba no tin luga pa hinca e hende muhenan cu problema di adiccion. Esaki ta motibo ta cu mester a accelera e proyecto. “Esaki lo no tabata posibel sin e ayudo di Freedom House y Teen Challenge Oklahoma cu a pone nan curason pa yuda e hende muhenan na Aruba. E ta algo grandi pa nos, ya cu no solamente nan a yuda nos cu e programa y set-up di e centro, pero tambe a yuda nos cu algo di e fondo necesario. Si despues nos kier sigui crece, nos mester di ayudo.”
Nan ta kere cu cada ciudadano tin un famia of un conocir cu ta pasando den un situacion dificil, y kisas hopi biaha no ta nan mes a scoge pa ta eynan, pero si nan tin boluntad pa haci e cambio, nos di e fundacion Adult & Teen Challenge ta cla pa yuda nan.
Tur esnan cu ta interesa pa haya sa mas di e fundacion aki, por simplemente subi nan Facebook Page, unda tin tur dato y con pa tuma contacto cu un persona di e organisacion aki pa ayudo. “Nos ta un fundacion no-lucrativo y nos ta depende completamente di e proyectonan sostenibel cu ta bini di nos organisacion, pero tambe di donacionnan cu ta drenta. Comunidad tambe lo por yuda e fundacion den su proyectonan,” el a duna di conoce.
