E Team di Kustwacht ta full prepara y ta traha tambe den cordinacion cu e demas departamentonan di husticia. E accion ultimo unda a pone man riba varios ilegal cu a yega tera y tambe boto cu capitan y ayudante riba lama ta un trabou conhunto.
E demas dienstnan di husticia ta envolvi mecos cu Kustwacht. Ya caba tabata pendiente pa e yegada di e boto. Asina ta pendiente pa mas boto cu lo por drenta. E weekend aki mes e lama lo ta full plat y aki Kustwacht y Polis cu nan team ta den alerta pa drenta den accion na e momento exacto. E boto cu a drenta ultimo ta un boto di palo sin nomber cu dos motor.
E tabata tin cinco poron di gasolin abordo. Segun informacion a logra baha 17 hende. Polisnan riba tera den nan buskeda a logra haya 10 en total. No ta esnan di helicopter a haya e ilegalnan. Ta e polisnan na pia buscando a haya e prome cinconan scondi den un pida cuarto na rand di e cura di e hotel nobo. A haya cos mas pabou scondi y despues a gara otro tres. Asina mes tin cu a logra scapa y nan a haya un lift cu hendenan cu a bin buscanan. Autoridad ta sospecha cu a bin droga tambe den e trip ultimo. Lo keda pendiente pa e proximo oranan nos dilanti pa mas informacion di e salida di botonan for di Venezuela. Na Aruba mes tin basta Venezolano disgusta cu e accion di nan paisanonan cu ta drenta Aruba den forma clandestino y comete crimennan.
Nan ta sinti cu e casonan aki ta afectando nan presencia legal na Aruba y den e comunidad local. Nan ta desaproba totalmente e actonan aki ora bo papia cu nan riba caya. E actonan aki ta trece un aspecto di inseguridad total pa nos pueblo y cualkier otro persona biba na Aruba. Un biaha mas un pabien na e Polisnan di straatdienst na San Nicolas cu a move sin miedo pa topa cu e ilegalnan scondi unda ni lus ta yega. Mescos ta pa e personal di kustwacht cu tambe ta Sali sin miedo riba lama pa tene nan accionnan. Den e caso aki un biaha mas mester remarca cu e helicopter no a topa cu ningun ilegal durante su presencia.
