Bou grito a bati alarma p’un caso di robo diasabra marduga algun minuut prome cu 4:00 am. E caso a sosode den Nobelstraat den companashi. Mesora su tras a cuminsa c’un buskeda intensivo rond Aruba, primordialmente den Playa. E accion rapido di e polisnan a duna su resultado mirando cu algun rato despues a señala e auto tambe.
E polisnan di districto di Playa mesora dun’e chauffeur señal pa para. Ta trata aki di un auto marca Hyundai modelo Getz color preto, numera A-9997. Comosifuera poco, e chauffeur a haya ta bon di mara trot, paga luz y cuminsa core pa polis. E patruya di polis a pidi mesora pa refuerso di tur su coleganan riba caya. Patruya di Sta. Cruz, Noord y hasta esunnan di San Nicolas a dirigi nan mes pa Playa.
Mientrastanto e patruya tras di e Getz a start un persecucion formal tras di e Getz. Den e auto tabatin dos persona. A sigui nan tras te cu a logra para nan den Madiki. Tabata un caya sin salida, pues no a keda nan nada otro di bula’fo y purba huy na pia. E plan pa huy na pia a funciona solamente pa un di e ladronnan, e otro, polis den un forma masha tactico a mand’e suela y pone come tera mesora.
El a hasta purba tira sla riba e polisnan, pero e no a conta cu el a topa cu un di e polisnan cu masha conocemento y experencia den tira sla y pone hende plat. A deten’e t transport’e pa ward’i polis. Na warda, un sub-fiscal lo procesa su detencion, kende lo dicidi sea riba su encarcelacion of libertad. Un takelwagen a presenta na sitio y a bay cu e Getz pendiente investigacion, e doño por ta contento cu e trabou cu e polisnan a haci, caminda cu den menos di 30 minuut a topa cu su auto bek.
