Diabierna anochi alrededor di 9:05 pm a sosode un accidente basta fuerte riba e caminda di Westpunt. E accidente a sosode net n’e entreda pa bay Esmeralda. Un Jeep Wrangler color geel biniendo for di panort pa un motibo of otro a baha caminda, dal contra di un Honda color preto pa djey bolter y bay dal contra un palo di luz.
E chauffeur di e Wrangler a resulta herida cu kap profundo na cabes. Debi na e impacto fuerte, e auto a keda pega riba e persona. E persona no por a move pa cual a pidi materialen wagen di brandweer presenta cu maximo urgencia.
Un total di dos unidad di ambulance a presenta na sitio pa brinda atencion medico, na final ta solamente un persona a resulta herida. Polis a cera ambos banda di caminda mientras e polis di trafico tabata documenta e caso aki. Bisiña a conta cu a scucha un zonido fuerte, ora a sali pafo a topa cu un Jeep cu cuater taira den laira.
