Dialuna anochi alrededor di 7:18 pm a sosode un accidente pisa rib’e caminda di Washington. Aki ta caminda cu un auto marca Suzuki color shinishi, numera A-65400 a accidenta su so. Tur cos ta mustra cu el a coy e bocht mucho grandi y pa un motibo of otro a perde control.
E impacto tabata fuerte y e auto a dal den pal’i luz. E chauffeur masculino tabata pega den e auto. Ta tur motibo pa tanto polis, ambulance y brandweer presenta cu maximo urgencia. Despues di hopi trabou, a logra saca e victima for di auto. Ambulance a transport’e cu urgencia pa hospital, caminda el a ricibi atencion medico avansa. Personal di Elmar a presenta pa atende cu e palo di luz.
E accidente a laga henter e area di Washington y Bubali sin coriente. Despues di un rato a logra resolve e promblema aki. Segun vocero di polis, Lito Lacle, a nota cu e victima tabata sangra basta na su orea. El a confirma den un entrevista exclusivo cu ta trata di un solo persona envolvi den e accidente pisa aki. Polis di trafico y e team forensico di polis tambe a presenta pa atende cu e parti di investigacion.
