Abogado mr. Doris Canwood, representando su cliente Alan Howell den e caso Diamanta, a bisa cu e no ta mira ningun caminda cu corte lo por declara e acusado culpabel di malversion. Su cliente a laga tur transaccion di e fundacion wordo evalua pa dos diferente accountant. E rapportnan a mustra cu e suma total di Afl. 197,404,= ta bon responsabilisa den administracion di e fundacion. Inclusive a sali na cla cu e fundacion ainda debe Howell placa. P’esey e team di defensa ta conclui cu no por proba e acusacion di malversacion ni esun di falsificacion.
Placa cu el a uza di e fondo cash cu e tin na cas, gespaar den transcurso di añanan, a uza pa paga Fonso Advisory, cu despues a traha un factura pa e fundacion paga Howell bek. Howell por medio di su abogado a puntra kende ta esun perhudica den e supuesto caso di malversacion aki. E placa tabata di e fundacion, cu no a entrega keho ningun dia. Ademas, basa riba ley existente, e forma con y pakico e placa di e fundacion por wordo uza ta hopi amplio. Tur cos ta keda na discrecion di e fraccion en cuestion, basta cu e no uz’e pa pago directamente na e mesun miembronan di fraccion.
Pa e motibo aki tambe Howell ta di opinion cu e fundacion por a uza e placa pa pago di servicionan cu Fonso Advisory, Carolina Rojas-Lacle y E Arubiano News (Farrah Boekhoudt) a brinda na e fraccion. Ta papia di un suma di Afl. 100,500,= cu a saca den forma cash den 26 bes, entre 28 di mei 2019 y 24 di maart 2021. A splica cu a saca e placa aki cash pa diferente asunto. Tin pa pago na Howell y Marisol Lopez-Tromp y pa pago di Fonso Advirsory. Tabatin facturanan di E Arubiano News cu a paga. Pero tampoco por proba cu a traha facturanan falso, manera e acusacion ta bisa. A splica cu suma manda pa Who is Love, cu no ta un persona pero e slogan cu partido POR tabata uza pa campaña.
E loke cu fiscal a cuestiona di facturanan di E Arubiano News cu a cambia (adapta), no ta Howell tabata haci e adaptacionnan aki. Farrah Boekhoudt tabata comete fout den e facturacion y despues ta hay’e cu mester drecha nan. Esakinan ta bay bek pa Howell cu ta entrega esaki na e tesorera. Ademas, e facturanan a mustra Boekhoudt, kende a reconoce nan como su facturanan. Di cual algun tabata adapta. Fiscal mes a conclui aki cu mester absolve Howell di e acusacion aki y e abogado ta di acuerdo cu ne.
