E caso contra e hoben Ryson Paskel, acusa di a asesina Camilo Sosa dia 2 di september 2018 na Arowak Garden, a tuma luga awe mainta den Corte di Prome Instancia di nos pais. Un caso sigur hopi lamentabel cu a laga famia di e hoben victima cu hopi dolor atras.
Abogado Chris Lejuez a defende e acusado Ryson Paskel den Corte. El a bisa cu esaki ta un caso hopi tristo. Manera cu defensa y Hues a trece padilanti, tabatin dos hende hoben envolvi, di cual un di nan a perde su bida y e otro awe, tabata dilanti di Hues. Fiscal a pidi un castigo di 12 aña di prizon pa Paskel.
Abogado Lejuez a sigui conta cu su cliente a declara loke a sosode e anochi di e tragedia tanto na Polis como den Corte. Loke el a bisa si ta cu prome cu e pelea a cuminsa, unda cu el a haya sla y despues cuater persona a atak’e. Su wowonan a bira scur y a comete un hecho, cu despues a lamenta di loke el a haci.
Demanda
Defensa di Paskel, segun abogado Lejuez, ta totalmente di acuerdo cu e Fiscal, cu no tabatin premeditacion. A purba di splica na Hues un biaha mas cu defensa ta di opinion pakico no tabatin premeditacion. Tambe defensa ta opina cu tabatin un exceso di self-defense, cu a bay mucho leu. A base di esey a pidi pa Hues considera e puntonan ey. Si tabatin exceso di defensa, por hiba na declara e persona liber y si no tin premeditacion, baha e castigo considerablemente pa e sospechoso aki.
Defensa
E pelea a sosode, pero e emocion cu e sospechoso tabata aden, no a pasa ainda. El a keda te na final, te despues di e hecho. Ta conoci cu ora bo ta papia di un emocion cu ta sigui permanente pa un tempo, no necesariamente ora cu e pelea a caba. Esey a sigui y no mucho tempo pasa, Hof na Corsou, a tuma un decision den un caso similar y a tuma e conclusion cu por pasa cu despues di tempo por tin exceso di emocion.
Mayornan di e victima
Mama di Camilo Sosa, Raquel, a menciona cu ta haya lamentabel cu ainda husticia no a prevalece. Nan kier pa husticia prevalece. Pa e mama, 12, 20, 30 aña no ta nada, pasobra su yiu no ta bibo mas. Pero toch, mirando e situacion cu tabata asina hopi horibel, 12 aña no ta nada toch pa e famia. Sinembargo, en bista cu ta 12 aña sin derecho di rebaha, toch ta un tiki satisfactorio. Normalmente aki na Aruba ta duna 15 y ta sali cu 10 aña. Ora duna 20 aña ta sali despues di 15 aña. Esaki ta 12 aña sin derecho di rebaha. E mama ta sinti su mes un tiki satisfecho cu esaki, pero no contento!
Posicion di Fiscal
Raquel Sosa ta sigui bisa cu el a nota cu Fiscal a mantene su palabra, a papia manera cu e mester a papia. E ta hopi gradicido tur loke el a bisa y tur loke a wordo trata den Corte.
E caso riba su mes
E caso riba su mes ta uno hororoso pa famia. Mama di Camilo Sosa, a bisa cu e hendenan no por pensa cu pa motibo cu a perde un mama of un tata, esey ta dunabo derecho di kita bida di otro hende. Pa e mama, esey ta un excuus. Raquel Sosa tambe a yega di perde su mama. Tin hende a yega di perde su tata, pero no a coy e caminda malo. Dicon mester coy e caminda malo, si bo mama of tata a muri. Esey ta pa mustra con famia awendia ta degradando, cu pa motibo di perdida di un ser keri y cu no tin e cuido, no tin e ayudo di su propio famia, muchanan di awendia ta sali bay caya, haci daño na otro famia. Pesey Raquel Sosa ta pidi full comunidad di Aruba, tur mama cu tata, por fabor, percura bon pa bo yiunan, wak kico nan ta haciendo. NO ta pa motibo cu bo a perde un mama, un tata, un ruman, y bo ta bay haci cos malo riba caya. Ta pidi pueblo di Aruba pa concientisa riba esey.
Raquel Sosa a perde su yiu por nada, djis pa un mucha cu tin un problema psicologico den trauma, cu su mama a muri, pesey a mata su yiu. No tabatin ningun otro motibo, Raquel Sosa a comenta.
