Abogado Chris Lejuez a representa varios comerciante. Ta trata aki di 23 cliente en total den caso Ibis.
Como prome reaccion despues cu hues a dicta sentencia, di e 23 clientenan, 5 di su clientenan a wordo declara liber, 9 a haya boet, 4 a haya trabao pa comunidad y 5 a haya castigo di prizon.
Di e 5nan cu a haya castigo di prizon, tin cu a sinta castigo caba. Nan a haya un castigo igual na loke nan a sinta den voorarrest.
Lejuez a spera cu e castigo di ex minister Croes, lo a baha mas. E exigencia di fiscal tabata 5 aña y huez a duna 4. El a duna un relato extenso pakico el a yega na e castigo ey. Con el a yega na tur locual cu fiscal a pone, acusa sr. Croes di dje, a wordo considera como proba.
P’esey el a yega na e castigo eynan.
Fuera di esey, Croes, ta keda 9 aña cu e no por fungi pa ningun trabao den gobierno, ni como ambtenaar, ni como politico cu ta nombra den un posicion den gobierno.
Exigencia di Fiscal
Loke a pasa, ultimo biaha hues comisario a suspende e detencion di Croes. Tanten cu el a suspende, no por cere. Fiscal a pidi pa kita e suspension eynan y detene. E hues no a bay di acuerdo. Ainda Croes por bay den hoge beroep. Ainda den apelacion e por keda liber. Te dia cu e decision final yega den su caso. Esey por dura, si ta solamente apelacion, cu por dura hopi luna. Si tin cassatie, e por dura mas cu un aña.
Apelacion
Lejuez no a lesa e vonnisnan ainda. A keda di hayanan for di hues. E ora e lo repasa esaki cu su clientenan. Mayoria di nan ta satisfecho di loke nan a haya. Mayoria a haya un boet. Nan a bisa cu lo prefera di pag’e y cos a caba eynan. Tin di nan a bisa cu tin cu pens’e ainda pasobra cu nan tin otro interes, por ehempel pa no haya un strafblad.
Un caso costoso
Ta un caso grandi y a costa hopi placa. Lejuez’ no por a duna opinion si e ta hustifica of no. Segun e hues, corupcion den gobierno ta hopi serio y ta consider’e di por hustifica e gastonan haci.
Falta di ley
Lejuez a yega di menciona den pasado, unda con por financia campaña. Na Hulanda tin’e como Wettelijke Financiering Politieke Partijen, cual no tin’e na Aruba. E ley ta mustra hopi cla ki ora bo tin mag y ki ora no tin mag di duna un sponsoring, cumpra carchi, etc.
