Despues cu a sali den prensa cu a wanta rector cera den oficina, su abogado mr. Desiree Croes a duna di conoce cu ayera, Tim Croes den su funcion di rector a pidie conseho huridico. E conseho tabata a base di un situacion indesea cu e y mayoria di docente ta pasando aden. mr. Desiree Croes a conseh’e y a spera cu por a soluciona e situacion di un forma pacifico.
Awe tardi mientras e docentenan hunto cu conrectornan y e rector di Colegio Arubano tabata den un reunion di urgencia pa presenta Directiva di SVOA un carta, presidente di SVOA a forsa Tim Croes den un oficina y na un forma bruto obliga e rector pa splica kico a papia den e reunion cu e docentenan.
E abogado a sigui splicu cu logicamente cu e rector na acepta e forma di “reuni” aki. A yama polis pa por calma e situacion, mirando cu el a bira hopi tenso. Rector a duna di conoce cu e ta keda dispuesto pa reuni pero den presencia di su abogado. Na momento cu e abogado hunto cu su cliente tabata warda e resto di directiva yega Colegio Arubano pa por hiba un reunion, directiva a dicidi di schors e rector.
E rector no ta acepta e schorsing y ya a informa directiva di esaki.
Mientrastanto ta compronde di e cuerpo di docente do Colegio Arubano cu mañan lo pone trabou completamente abou. Rector, conrectornan y e docentenan ta spera cu directiva di SVOA sa di minimalisa e daño cu esaki por trece pa enseñansa na Colegio Arubano.
Rector un bes mas ta enfatisa cu e ta dispuesto pa papia cu directiva y sigui haci su trabou.
