Abogado mr. Doris Canwood a desabarata e ponencia di Ministerio Publico cu Leoncita Arends a soborna Benny Sevinger. A papia hopi di un suma grandi di placa cu Arends lo a manda pa Sevinger por medio di un persona cu e conoce. Y e persona aki lo a declara cu e ta kere cu por papia di 200 mil florin, tur na papel di 100 florin. Pa e punto aki a abogado a bin bon prepara.
Den e parti di soborno ta hunga un rol importante declaracion di e testigo Gen Roja. Den su declaracion a menciona cu el a hiba un envelop dobla den 4. Pa ilustra e situacion e abogado a saca for di su tas copia di biyetenan di 100 florin.
Mirando cu e testigo ta papia di 200 mil florin, el a trece 2000 biyete di 100 florin. El a pone diferente stapel di esaki riba mesa di hues y tambe un envelop cu ta parecido na esun den cual e biyetenan tabata hinca. E testigo a bisa cu e stapel di placa tabatin un haltura di mas o menos 7 cm, mas halto cu un pan cu hamburger.
El a ilustra na hues cu e stapelnan di placa cu el a pone riba mesa nunca lo por fit den e envelop cu e testigo a describi y a bisa cu el a hole cu tabata placa. Esaki a pesar cu e no a habri e envelop pa mir’e. Banda di dje, el a pone un otro envelop cu ticketnan di Lotto di Merca cu tin e tamaño mas o menos di un biyete di 100 florin. E envelop aki si tabata cuadra cu e descripcion duna door di e testigo, esta con diki esaki tabata. El a bisa hues pa chek cu fiscal cu si nan por logra hinca e 2000 biyetenan di 100 florin den e envelop. Un oferta cu nan a nenga.
Pakico e abogado a trece esaki padilanti? Pasobra Roja den su declaracion a bisa cu tabata trata di un suma di rond di 200 mil florin cu Leoncita a manda pa Benny como recompensa pa benta di e terenonan cu el a haya pa e companianan den cual e tabatin shares. Den su declaracion Roja mes ta bisa cu e no a habri e envelop pero e por a hole cu tabata trata di placa. Y esaki ta e unico testigo cu ta bisa cu Arends a duna Sevinger placa, mientras cu loke e ta bisa no ta proba.
Ta e casa di Sevinger a trece e ticketnan di Lotto for di Merca pa Arends, como un fabor y e homber a bay busca nan cerca dje. E ticketnan aki tabata den e envelop dobla. No tin nada otro cu ta musta cu den e caso di Leoncita Arends tabatin pagamento placa di soborno pa cual no tin nada pa condena y a pidi pa declar’e liber di e acusacion aki tambe.
