Diadomingo anochi a tuma luga e concierto “Duelo de Géneros” entre e dos artistanan Colombiano Yeison Jiménez y Elder Dayan Diaz.
E concierto a inicia pa 8:30 pm cu Rumba Caribeña sigui p’e artista local Jerino ‘Bass’ Ridderstap y DLS a duna un toke tropical y a pone ambiente cu musica varia. Pa 10:00 pm Jiménez a subi stage y a pone ambiente cu su genero popular ranchera. Hopi hende a lanta y cuminsa baila, canta e canticanan entre otro “A mi me gusta la parranda”, Soy aventurero” y hopi mas.
Despues di algun ora e yiu homber di e grandi di vallenato, Diomedes Díaz, esta Elder Dayán Díaz, a subi stage cu su energia contagioso. Hunto cu tocado di arcordeon Lucas Dangond nan a pone tur hende lanta fo’i nan stoel pa baila. Den cada cantica e tabata menciona e nomber di Aruba.
E publico presente a baila y canta e exitonan di Diaz cu tabata “Somos amantes”, “Naci solo”, “Modo avion” y hopi mas.
Na final di anochi e hendenan a sali contento di por a presencia e concierto di “Duelo de Géneros”, unda a scucha e miho canticanan di Yeison Jiménez y Elder Dayán Díaz.
