E abogado Colombiano a subi avion mainta bula bin Aruba, reuni cu varios minister den Cocolishi y despues reuni cu bufete di abogadonan Croes, Wever & Ruiz. Djey el a subi su avion priva bek y a regresa Colombia pa informa su clientenan di e reunion fructifero cu e tabatin cu e centro di poder di nos isla. E ta representa varios comerciante cu ta interesa pa inverti na Aruba. Ta parce cu e abogado aki tabatin hopi suerte of a haya bon ayudo di e bufete partner na Aruba pa por a topa cu ministernan asina lihe, riba un dia.
Abelardo de la Espriella Otero, naci na Bogotá dia 31 di juli 1978 ta un abogado y columnista Colombiano. E ta abogado y maestro den Derecho di e Universidad Sergio Arboleda, specialista den Derecho Penal y Ciencia Criminologico di Universidad Externado de Colombia, specialista den Derecho Administrativo di Universidad del Rosario y Doctor Honoris Causa den Derecho di Universidad Autonoma del Caribe.
Abogado Abelardo de la Espriella Otero ta masha popular na Colombia, pa a atende casonan “high profile” cu a haya masha atencion nacional y internacional. Asina el a defende figuranan manera ex-presidentenan di otro pais, comerciantenan y hasta sospechosonan den narcotrafico. E tin riba 100 mil siguido riba su rednan social y cu masha frecuencia ta sali riba potret cu politiconan, cantantenan y otro personahenan conoci na Colombia.
Den ki ramo di negoshi e ta interesa pa desaroya na Aruba no ta conoci. Riba nos pregunta cu si nan lo kier inverti den refineria, nos a haya contesta negativo. E abogado tin varios idea masha grandi pa un grupo di comerciante Colombiano cu ta mira Aruba como un pais cu hopi posibilidad economico.
