Diasabra anochi alrededor di 8:00 pm polis a presenta cu urgencia na un cas den Missouristraat na San Nicolas p’un homber indesea den cura. No ta prome biaha cu polis ta atende cu e homber aki, e ta un conoci di husticia. Parce e tabatin intencion pa agredi e doño di cas.
El a haya ta bon di bula cura y drenta manera ta cas el a yega. Segun informacion ricibi, e homber aki tin prohibicion pa yega cerca di e cas. Pa completa e combo, e tabata burachi tambe, ta suficiente motibo p’e defensornan di ley deten’e y hib’e pa warda di polis.
Na warda a present’e dilanti un subfiscal kende lo dicidi sea riba su libertad of encarcelacion. Pa awo, e lo drumi den warda den e compleho di cel recien renoba.