A.T.A. y Aruba Convention Bureau (ACB) ta orguyoso di por a forma parti di proyecto Edmentum. Un proyecto cu ta enfoca riba educacion, cu enfasis riba renobacion of construccion di un espacio educativo. Proyecto Edmentum ta diseña pa tin un impacto duradero riba e comunidad local mientras ta ofrece un experencia significante y agradabel pa tur e participante/ boluntario local y internacional.
Edmentum ta un compania di educacion internacional cu anualmente ta scoge diferente proyecto comunitario rond mundo pa forma parti. E aña aki a scoge pa bishita diferente Centro di Bario na Aruba pa asina selecta e centro cu lo forma parti di e proyecto. Despues di e diferente bishita, e compania a selecta Centro di Bario Lago Heights como e organisacion beneficiario pa e proyecto. Bou guia y sosten, CEDE ARUBA a keda encarga na lidera e planificacion y coordinacion di e proyecto.
Riba un diasabra mainta, por a conta cu mas di 80 ehecutivo di compania Edmentum y bishitante di e isla cu a cumpli cu e biahe pa Aruba y asina dedica entre 4 pa 5 ora di servicio comunitario. Alabes, a conta cu participacion di contratista local di e proyecto, A.T.A. hunto cu Aruba Convention Bureau (ACB), y mas organisacion local cu tambe a contribui na e proyecto.
E iniciativa aki tin como meta fomenta envolvimento comunitario y educacion mientras ta brinda un experencia unico pa e participantenan. Pa A.T.A. y ACB, esaki ta nifica un contribucion significante na e comunidad di Aruba, specialmente na e bario di Lago Heights.
Tocante Aruba Convention Bureau:
Aruba Convention Bureau (ACB) como parti di A.T.A. ta dedica na promove Aruba como un destinacion atractivo pa organisa reunió, biahe incentivo, conferencia, y exhibicion (MICE) na companianan internacional. Pa medio di e socionan strategico y servicio di calidad mundial, e ACB tin como meta pa atrae y sostene eventonan cu ta contribui na crecemento y desaroyo economico pa Aruba.
Tocante Aruba Tourism Authority (A.T.A.)
Desde prome di januari 2011, Aruba Tourism Authority ta opera como un entidad ‘Sui Generis’. Un organisacion independiente den e esfera publico. Aruba Tourism Authority ta fungi como ‘Destination Marketing and Management Organization (DMMO)’ y ta responsabel pa uni interes turistico entre e socionan local e internacional.
A.T.A. ta pone hopi enfasis riba e modelo di “High Value-Low Impact” cu ta para pa un balans entre aumenta e balor economico di e bishitante, posiciona Aruba como un pais desea y sostenibel, y posiciona Aruba como lider di desaroyo como un destinacion. Cu meta pa sigui mantene e esfuersonan den linea segun e balanse menciona, y logra aumenta entrada pa medio di calidad di turismo en bes di e volumen cu nos destinacion ta ricibi. Capacidad di carga ta sigui ricibi atencion di parti di A.T.A.
