Minister di Husticia y Integracion, mr. Andin Bikker a anuncia awe mainta cu el a caba di suspende e hefe di Warda nos Costa, Elio Blijden, relaciona cu un incidente cu a tuma luga den fin di siman. Ta acusa Blijden di lo a deporta un criatura di apenas 15 aña for di Aruba, sin consulta cu e Minister prome. E hoben tabatin status di “ilegal” na Aruba, aunke bou guia y custodia di Crus Cora.
E decision pa deporta un menor di edad ilegal awor ta hinca Aruba den un posicion masha fastioso pa loke ta trata Reino Hulandes y nos relacionnan cu Merca, pa loke ta e proceduranan acorda pa maneho di asilo, asina e mandatario a anuncia awe.
Minister Andin Bikker a bisa awe mainta den e conferencia di prensa di Gobierno cu el a dicidi pa mesora pone Elio Blijden riba “non actief”.
E decision aki ta los di otro kehonan cu a yega na su Ministerio di e mesun tema aki, esta e procedura cu ta hiba pa deporta un turista cu un status di “ilegal”.
Separa di esey tambe tin otro kehonan di formanan straño con ilegalnan den pasado a logra huy di e luga, sin cu nunca a duna un splicacion aceptabel. Mientrastanto maneho di WnC ta keda awor directamente bou direccion di Migracion Aruba, unda tambe tin un Management Team nobo.
