Obispado di Willemstad a saca un Decreto pa tur sacerdote, diacono, religioso y laiconan di Obispado di Willemstad, cu ta conta pa e seis islanan.
E Decreto ta bisa lo siguiente:
“Mi rumannan stima: Cu e unico meta pa sigura cu nos ta tuma e medidanan necesario pa evita mas tanto posibel di keda afecta pa cu COVID-19, e corona virus, mi ta mira e necesidad di publica e siguiente decreto cu ta drenta na vigor awe 16 di Maart 2020.
Despues di a tuma medidanan di precaucion cu e carta publica dia prome di maart 2020 y tambe 14 di maart 2020, den cual mi ta menciona cu si ta necesario lo bini cu medidanan adicional na bienestar di un y tur.
Despues di a sigui e informenan oficial emiti pa nos Gobiernonan local di cada Isla, y tambe tumando na cuenta e importancia di no tin aglomeracion di hende p’asina yuda contene e virus aki.
Despues di a tuma nota di Obisponan di nos region y di otro paisnan encuanto e Celebracionnan Liturgico den Iglesia Catolico.
Mi ta decreta cu nos ta pospone tur Celebracion Liturgico, pero tambe actividadnan di caracter formativo, Catisashi, prosecionnan, fiestanan parokial y actonan religioso publico te na un proximo aviso.
Nos lo keda celebra e Sacramento di enfermonan, tumando na cuenta e medidanan di higiena cu nos tur tin cu atene na dje. Mi ta anima y encurasha tur nos fielnan pa sigui celebracionnan di Misa manera ya indica via di radio, television of Facebook.
Mi ta bolbe sigura boso cu e medidanan aki ta pa hunto nos yuda contene mas cu ta posibel e virus aki pa su impacto ta minimo riba boso tur. Boso salud ta di gran importancia no solamente pa evita coronavirus, pero tambe en general. Boso por sigui conta cu mi oracion y ta urgi boso pa nos tur keda cu nos bisa fiha riba Hesus nos Salbador y keda uni den oracion den e temporada aki di Cuaresma preparando e solemnidad grandi di Pasco di Resureccion.”
