Diaranzon, 16 di December tabata un dia special pa tur e boluntarionan di Cruz Cora Aruba cu a traha incansabel for di maart cu comienzo di e pandemia di Covid-19 na Aruba.
Tabata un sorpresa prepara pa duna reconocimento den forma di un medaya. E medaya aki ta un “herinneringsmedaille” cu a wordo oficializa na 1926 pa Reina Wilhelmina na honor di su 25 aniversario di boda cu Prins Hendrik van Mecklenburg-Schwerin. E prome 800 medayanan a wordo otorga na famia y miembro di Hof. E “herinneringsmedaille” a wordo usa na 1953 ultimo biaha, despues di e disaster di inundacion na Hulanda.
Pa haci e acto oficial aki, Gobernador di Aruba, Su Excelencia Alfonso Boekhoudt tabata presente na Cruz Cora Aruba. Tumando protocol di distanciamento social na cuenta, Director di Cruz Cora Aruba, Sr. Michel La Haye a ricibi Gobernador na yegada y a introduci’e na e grupo di voluntario cu ainda no tabata sa cu ta pa un medaya di reconocimento nan a wordi invita.
Gobernador a gradici e voluntarionan pa nan gran esfuerzo durante e aña aki. Tambe a para keto na e diferente logronan di Cruz Cora Aruba durante e temporada di corona specificamente. Seguidamente e boluntarionan presente a ricibi e noticia sorpresa cu Su Excelencia lo haci entrega di e prome medaya di reconocimento, cu ta especialmente pa tur boluntario di Cruz Cora Aruba cu a yuda haci e trabounan durante 2020 posibel. Tumando na cuenta e medidanan vigente, Gobernador Boekhoudt simbolicamente a haci entrega di e prome medaya na Sr. Gilbert Flanegin. Un team a reparti e sobra di medayanan na mesa pa tur voluntario presente.
Miembro di directiva, Sr. Jurgen van Schaijk, a dirigi su mes na tur voluntario, gradiciendo nan pa e dedicacion den 2020, felicitando nan y deseando nan tur cos bon pa e aña nobo.
Cruz Cora Aruba ta felicita tur voluntario cu a forma parti di e programa di ayudo aki durante tanto luna, y ta spera di por sigui conta cu cada un di nan pa 6 luna mas te ora e programa aki culmina. MASHA DANKI PA TUR E ESFUERZO!
