Corte a trata awe e caso penal contra Shannon Williams, Ka Min Li y Jian Wei Li pa e caso di matamento di e hoben Eddy Rincon di 19 aña di edad, riba dia 30 di november aña pasa. Williams a nenga di duna declaracion na polis. Diahuebs a haya un declaracion por escrito pero for di su abogado.
Aki den e ta papia di un discucion pa pago di 50 florin di cocaina cu el a caba di cumpra pa Eddy y cu Eddy no kier a pag’e. E ta bisa cu Eddy a saca e arma y den e lucha pa apodera di esaki, ora Eddy kier a bula for di bentana, accidentalmente “mi a hala e trekker”.
Declaracion di otronan den auto ta diferente y ta bisa cu Shannon tabata esun cu a bini cu e arma. Pero tambe e testigo di e sucedido, cu ta biba eybanda, a conta e palabranan cu Eddy a expresa na dje. Esta cu Shannon a tir’e y a horta tres mil florin di dje.
Echo ta cu tanto Williams y Ka Min den Corte a trata di cambia loke nan a bisa pa suavisa e situacion. Fiscal a conclui cu e homber Williams no a mustra arepentimento y no a mira motibo pa pidi un castigo menos cu 19 aña cera den prizon.
E otro dos acusadonan no ta proba cu nan tabata sa kico Shannon Williams ta bay haci y por proba solamente posesion di arma (un otro cu no ta esun uza pa tira Eddy). Pa detaye completo di e caso, lesa e edicion di TREMPAN di mañan.
