E aña aki e competencia di “Twelve hours of Aruba” a conoce un record di riba 300 participante total cu a participa na e competencia di ciclismo den diferente categoria pa 12 ora largo.
A combersa cu e organisado di e evento deportivo Silvhyânne Vrolijk cu a splica tocante e evento aki. Tin shete aña ta organisando evento cu anteriormente tawata na e area Alto Vista, pero debi na crecemento di e evento a dicidi di muda e localidad pa Sero Cristal for di dos aña pasa.
A ricibi reaccion positivo di e publico pa e cambio di localidad di e competencia pa Sero Crystal, cu ta ofrece mas facilidadnan y espacio pa e publico cu ta bin wak e evento deportivo.
E team di ciclismo completo a consisti di riba 300 coredo participando den diferente categoria manera: “Kids mountain bike race”, “Strider competition”, ”Mountain bike race””.
Vrolijk a splica cu e team ganado di e evento di “Twelve hours of Aruba” ta e team cu dal mas buelta den 12 ora. E teamnan ta diverso, tin categoria di dama y cabayero.
E organisado di e competencia di ciclismo a gradici tur e sponsornan, e team cu a duna apoyo na e evento, for di momento cu a cuminsa cu preparacion for di aña 2023. Vrolijk a gradici tur e ciclistanan pa nan sosten y participacion na e evento deportivo.
