Diasabra ultimo a tuma luga un momento special. Durante un actividad nacional di Scouting Aruba, caminda a conmemora St. Joris Dag, tabatin un momento di instalacion di un lider di e grupo.
A subi di rango den Grupo Scout San Dominico, for di assistent di e unidad di Verkenner pa e lider di e unidad di Verkenner, esta ‘hopman.’ Ta trata aki di Rudolfo Angela.
Angela tin 33 aña activo den Scouting. Mayoria conoc’e como Chikai, pero nunca tabatin interes den subi di rango, mirando cu p’e ta mas importante p’e trabou n’e muchanan compara cu subi den rango.
Sharlyn Farro ta lider di e grupo, el a conta cu e ta momento bunita mirando cu semper Angela a contribui positivamente den grupo. P’e ultimo dies añanan como AVL y awo oficialmente como VL. El a logra pa tur su verkennernan yega na ‘eerste klasse’ y awo tin como meta pa hiba nan n’e proximo nivel te na ‘kroon verkenners’.
Mirando cu tin mas AVL den grupo, tabata e momento perfecto pa instal’e como VL. Su pasion ta scouting, e ta haci tur cos p’e muchanan. E respet cu e tin den comunidad, ta inmenso, Farro a comenta. Durante e ceremonia di instalacion, a nota presencia di su famia completo y su hefe di trabou.
