E velorio na honor di e presidente di Haiti, Jovenel Moise, a cuminsa diabierna den e ciudad di Cap-Haitien, nort di e pais, oranan prome cu e entiero di e mandatario asesina dia 7 di juli ultimo.
Condolencia a cuminsa cu dos ora di retraso riba e orario premira y ta tuma luga den e hardinnan di Habitation Village SOS, residencia priva di famia Moise pafo di Cap-Haitien, cu fuerte respaldo di siguridad.
Seis solda di e Forsanan Arma di Haiti, bisti di gala, a carga e caha di morto, cu despues di a pone bao di un tent blanco, a cubrie cu e bandera nacional di Haiti.
E caha di morto lo ta exponi pa e poblacion bishita den e proximo oranan, despues lo tuma luga un santo sacrificio di misa y un ceremonia civil, unda cu e prome dama, Martine Moise, lo expresa algun palabra.
E entiero di e restonan di Moise lo tuma luga entrante 1:00 pm diabierna.
Ta premira cu e prome minister nobo di Haiti, Ariel Henry y su gabinete completo, acudi na e entiero, como tambe e ex-presidentenan di e republica y embahadornan di afo.
Tur esaki ta tumando luga bao di un vigilancia estricto despues cu diahuebs a registra disturbio den e ciudad.
Diahuebs a tuma luga un misa den e catedral di Cap-Haitien, stroba na varios ocasion pa e sostenedornan di e mandatario pidiendo husticia.
E misa a tuma luga a pesar di e protestanan violento riba caya di e ciudad aki, esun di mas importante den e parti nort di e pais, unda cu a kima tire y a registra enfrentamento di e manifestantenan cu polis.
A asesina Moise dia 7 di juli ultimo pa un grupo di homber arma cu a invadi su cas na Port-au-Prince sin e resistencia di parti di forsanan di siguridad.
