Den bida hende ta preocupa cu tur cos, pero hopi hende no ta preocupa cu nan salbacion, ni tampoco no ta interesa, na unda nan lo bay ora yega e momento yega cu nan bida termina aki na tera of miho bisa den boca di pueblo ora bo muri.
Hopi hende ta kere cu salbacion ta cambio di religion, hopi ta kere cu locual nan ta, lo ta suficiente pa drenta cerca papa Dios. Pero hopi no sa cu sin un bida cu Cristo aki na tera, lo no por tin un sosiego den shelo.
Hopi historia cu hende a inventa cu fierno ta aki bao mes y cu no tin shelo. Pero bo a yega di pensa como persona kico ta nifica biba henter bo bida sin Dios y kico lo pasa cu bo despues di bo morto.
Bijbel ta con ta nos den Lucas capitulo 16:19-31, e storia di e rico y Lazaro.
Den e historia aki nos por compronde cu shelo ta existi y fierno ta existi.
Dios ta stima tur hende y e no kier pa ningun bay perdi, Dios no a traha fierno pa hende, sino pa satanas y su demoñonan.
Hopi hende ta kere ainda cu bo por biba manera bo kier sin Dios y despues ora bo muri toch bo por alcansa shelo y esey ta un gran mentira.
Nos sa cu nos tur a peca, pero esey no ta nifica cu nos tin cu permanece den pica y ta p’esey Dios a manda Cristo Hesus y pa medio di dje nos tur por haya salbacion.
E persona cu kere den su curason y confesa cu su boca cu Hesus Cristo ta Señor esey lo ta salba, pero esey no tin nada haber cu religion, pasobra religion no por salba ningun hende, Dios a bisa cu esun cu kere den Su yiu Hesus lo ta salba.
Y esaki ta e prioridad pa tur famia, pa cada hende personalmente tin un relacion cu Cristo Hesus, caminda e ta entrega su bida publicamente na Señor.
Nos prioridad mester ta nos salbacion, nos sa cu placa ta importante, trabao ta importante, negoshi ta importante, pero importante ta, pa bo pensa como persona na unda lo bo pasa bo bida eterna den shelo cerca Dios of eternamente den fierno. (Lucas capitulo 16:19-31).
Pasobra mientras tanto bo ta na bida, bo por arepenti y aparta di maldad y Señor ta fiel y husto di pordona tur bo pica nan y lo bo ta salba, pero ora bo muri no tin chens pa arepenti.
Pero si bo muri sin arepenti, hibando un bida amarga yena cu falta di pordon, bo chens pa mira cara di Dios ta nulo, pasobra Bijbel ta bisa cu sin paz y sin santidad ningun hende lo mira e cara di Dios . Hebreo 12:14-15.
Awe ta un bon dia pa abo y henter bo famia dicidi di entrega boso bida na Cristo y asina ricibi bida eterna.
