Un rato pasa a anuncia cu a eligi Miss Nicaragua, Sheynnis Palacios, como Miss Universe 2023. El a yega final cu Thailandia y Australia como e tres ultimonan den e contienda.
E certamen a tuma luga den Jose Adolfo Pineda Arena na San Salvador. Miss Universe 2022, e Mericano R’Bonney Gabriel, a corona e Miss Universe 2023, mientras publico tabata aplaudi e resultado.
Presidente di El Salvador, Nayib Bukele a hiba palabra durante e evento final. El a bisa cu e ultimo cuater añanan el a traha duro pa drecha su cas, refiriendo na El Salvador.
Awo cu e cas ta cla, infrastructura mehora, awo cu tin mas siguridad y mas oportunidad pa tur Salvadoreño, awo a habri porta pa invita mundo pa bin cera conoci cu e cas nobo, bunita renoba. Y sin duda, Miss Universe ta duna un oportunidad unico pa expone e cambionan aki haci na mundo henter.
Na final a anuncia cu e certamen di Miss Universe 2024 lo tuma luga na Mexico.
Miss Universe 2023
Miss Universe 2023 tabata e di 72 edicion di e certamen di beyesa. E Miss Universe 2022 tabata R’Bonney Gabriel di Merca. E certamen a tuma luga den José Adolfo Pineda Arena na San Salvador, na El Salvador ruba diasabra dia 18 di november 2023. E ultimo biaha cu e pais tabata anfitrion di un certamen di Miss Universe tabata na aña 1975.
Tabatin 84 participante representando 59 pais of teritorio, cu a competi pa e titulo maximo. E edicion aki lo marca e debut di Pakistan den e certamen y e regreso di Bangladesh, Egipto, Guyana, Hungaria, Irlanda, Kazakhstan, Latvia, New Zealand, Norueha y Zimbabwe. Zimbabwe a competi ultimo bes na aña 2001, mientras Latvia na 2006, Guyana na 2017, Bangladesh, Egipto y New Zealand a competi ultimo na 2019, mientras cu e otronan a competi e ultimo biaha na aña 2021.
Pa prome bes den 66 aña cu e organisacion di Miss Universe a permiti pa hende muhe casa y cu yiu por participa tambe den e certamen. Rikkie Kollé di Hulanda ta e di dos muhe transgenero cu lo competi e aña aki.
E prome tabata Angela Ponce di Spaña cu a competi na aña 2018. Camila Avella di Colombia y Michelle Cohn di Guatemala a bira e prome señoranan casa y cu yiu, cu a participa den e certamen di beyesa mundial.
E aña aki lamentablemente Miss Universe China, Qi Jia, a keda afo. El a aplica pa su Visa asina cu el a gana e certamen na su pais pero autoridadnan a tarda pa dun’e. Ora cu finalmente a haya Visa y cu el a biaha mesora pa El Salvador, tabata mucho laat caba. Ya e otro participantenan tabatin un siman na e pais participando den varios evento.
Tocante Miss Universe Organization
Miss Universe ta un certamen anual di beyesa internacional dirigi pa Miss Universe Organization cu sede na Merca y Thailandia. Hunto cu Miss World, Miss International,
Miss Earth, Miss Universe ta un di e cuater concurso di beyesa internacional.
Miss Universe Organization y su marca, conhuntamente cu su concursonan ruman, Miss USA y Miss Teen USA, ta actualmente propiedad di JKN Global Group. E defensa di e certamen ta “asuntonan humanitario y ta un bos pa afecta cambio positivo na mundo.” Mester menciona cu Merca tin e record den mas corona di Miss Universe.
No menos cu nuebe biaha nan a gana e certamen, na aña 1954, 1956, 1960, 1967, 1980, 1995, 1997, 2012 y 2022. Na di dos luga ta sigui Venezuela, cu a gana e certamen shete biaha. Venezuela tabata Miss Universe na aña 1979, 1981, 1986, 1996, 2008, 2009 y na 2013.
Miss Universe no ta prohibi cirugia estetico
Miss Universe no ta pidi un minimo di estatura y ni tampoco edad ta hunga un rol mas. Miss Universe no ta prohibi pa un hende muhe cu a “pose” sunu of den lingerie participa. Miss Universe no ta solicita ni un maximo ni un minimo di peso pa su participantenan. Desde 2023 Miss Universe no ta prohibi e participacion di hende muhe casa, divorcia, mama of na estado. Ademas, Miss Universe ta permiti e participacion di hende muhe “transgender.”
E cobertura di Miss Universe for di San Salvador ta presenta exclusivamente pa Dufry Duty Free, cu su special na su tienda den Caya Betico Croes riba perfume y su RED App unda bo por spaar y uza punto. Tambe SETAR NV: Bo kier double data? Busca bo Prepaid Data Bundle di tres dia pa solamente Afl. 15,= y ricibi double data riba diabierna!
