Na un manera hopi peculiar, TOB Carnaval Group a introduci nan Reina Hubenil pa 2024 den persona di e hoben talentoso Guizza Maria Steenvoorde.
E coronacion a tuma luga na comienso di e evento di arte y tabata na encargo di e diseñador Ronchi de Cuba y Geraldine Muller den representacion di SMAC.
Grupo di Baile Dazzling Dancers y brassband Massive a duna un toke loke por spera di Carnaval 70.
Guizza Maria, no ta un desconoci den mundo di arte ya cu el a yega di duna un presentacion ‘solo’cual tabata un baile cu a acapara masha hopi atencion pa su bunita coreografia propio. Cu e baile aki el a clasifica pa Poder di Hubentud e tempo ey.
Guizza Maria desde su 4 aña ta baila. Na Hulanda cu Danzation na Zeist y desde cu el a bin establece su mes na Aruba, hunto cu su famia na 2013, e tabata participa activamente den Carnaval. Na varios ocasion e la sa di gana e premio di Dancing Queen den Parada Infantil.
Baile, actuacion, canto, declamacion ta importante pa Guizza Maria. E ta forma parti di Club di Movimento. Pa tres aña consecutivo e tabata e ganadora di Arte di Palabra. E ta activo tambe den Poder di Hubentud.
Yega na corona su mes como Reina Hubenil di TOB Carnival Group, su grupo di Carnava, tabata su soño desde cu e la forma parti prome biaha cu su grupo TOB KIDZZ. “Mi mester a warda pa mi yega e edad pa por participa y tur aña ora mi ta bay apoya e reinanan, mi ta soña cu e dia cu lo ta ami riba e escenario.”
“Pami e soño di por representa TOB den Carnaval 70 ta algo sumamente grandi. MI a lanta cu TOB y ta echt un honor grandi pa ta nan representante. Africa ta nos tema, ideal pa baila. Mita bay gosa un poco mas manera tur aña, nada no ta cambia, wel, un tiki so, awor cu un corona cu mi ta orguyoso di dje, cu ta simplemente THE BOMB. “Hopi exito na tur reinanan cu lo participa pa Carnaval su festival cu ta priminti di bira excepcional,” Guizza Maria a vocifera, mientras cu e ta sigui baila “Like no one is watching”.
Palabra di pabien na TOB Carnival Group cu boso reina. Go for it, Guizza Maria.
